Tigi d timucuha n wedrar n Jerjer, adrar aberkan, adrar n nnif, adrar n lḥif : akken i s-yenna win n zzman :
i yebɣan lḥerma ad tagar Yali s adrar, Yečč abelluḍ bu tcacit Wi yebɣan irden d tfanṭazit Iṣub s azaɣar Ad yeɣleb agdi d temrit ! Yura-ten ccix Ibrahim Asedqaw di ttnaṣfa n lqern rbaɛṭac, ad yessifes fell-as Rebbi di ddunit, yeɛfu fell-as di laxert ! Amin !
6- Uccen d yilef
Seg weɣyul, uccen yeɛna ilef, yenna-yas:
- Atma-k, aha-ten da ẓẓaḍen abelluḍ, ttfeggilen akan s temɣilin-nsen, ssekfalen abeɛɛuq d iɛemmuren. Mi rwan, ruḥen ṭṭsen deg isegnen-nsen, jexxren yiwen ur asen-yettalas. Kečč, tuɣaleḍ-as dagi d tagertilt i yizem! Yernu tḥesbeḍ iman-ik d bab n yiɣil !
Ixaq yilef, yecxer fell-as, yerwel. Iruḥ wuccen s izem, yenna-yas:
- A lmir n lewḥhuc, qerreɛ iman-ik; ufiɣ-n ilef da d-yesseqḍaɛ timɣilin-is, yettgalla deg-k !
Yenna-yas yizem:
- Amek ara t-ɛeqleɣ ad iyi-d-yebdu ?
Yenna-yas wuccen:
- Mi t-twalaḍ anyir-is yekres, bnu f yiman-ik! (ɣas ar anyir n yilef dayem yekres !).
Yebren s ilef, yenna-yas:
- Ɛass iman-ik; da yettgalla deg-k yizem !
Yenna-yas yilef:
- Amek ara t-ɛeqleɣ ad iyi-d-yebdu ?
Yenna-yas wuccen:
- Mi t-twalaḍ cclaɣem-is da reqqsen, bnu f yiman-ik! (ɣas ar cclaɣem n yizem dayem reqqsen! )
Wwḍen tameddit, yemmuqel yizem deg yilef, iwala anyir-is yekres: yemmuqel yilef deg yizem, yufa cclaɣem-is da reqqsen. Msemlalen s temɣilin d waccaren, yiwen da ireɛɛeḍ, wayeḍ da iceexxer. Uccen ineggez akin, ar as-yeqqar:
- A tiḥeddirt i ḥeḍreɣ ass-a ! ….. a dda yizem ! a dda yilef ! ….
Yewwet-it yizem, yerẓat. Uccen yezla-t, yeslex-it, yegzem-it d sslayeɛ, ččan deg-s geddac d tiremt. Yefreḥ wuccen, yenna deg wul-is: Ussan yelhan uɣalen-d !
…. / …. yettkemmil
Yettwakkes-d si FDB ( Le Roman de Chacal) – Brahim ZELLAL – 1964
