Tigi d timucuha n wedrar n Jerjer, adrar aberkan, adrar n nnif, adrar n lḥif : akken i s-yenna win n zzman :
i yebɣan lḥerma ad tagar Yali s adrar, Yečč abelluḍ bu tcacit Wi yebɣan irden d tfanṭazit Iṣub s azaɣar Ad yeɣleb agdi d temrit ! Yura-ten ccix Ibrahim Asedqaw di ttnaṣfa n lqern rbaɛṭac, ad yessifes fell-as Rebbi di ddunit, yeɛfu fell-as di laxert ! Amin !
4- Uccen d tyaziṭ
IIɛedda wayen iɛeddan, iruḥ wuccen ɣer tyaziṭ, yewwet-as izli n tyaziḍin, yenna-yas:
- A weltma, d acu kem-yeǧǧan dagi ? Izem, mi d-turweḍ tamellalt, yečč-itt, talli timital-im zedlent; mi ssefrurxent, ffɣen-d yefrax, ten-sḍefrent tyemmatin tiseɛdiyin s igudiyen d tmizar d tebḥirin, nitni d ibaḥḥan irkell d-ččewčiwen irkell; mi ɛyan di tikli, d wexbaḍ d tyessawt, neɣ yenɣa-ten usemmiḍ, a ten-jemɛent seddaw wafriwen-nsent i wakken ad ḥmun ad steɛfun; ad imɣuren, ffɣent-d irkell d tifrax d sut tcebbubin !
Tayaziṭ ur as-d-terri imien, merreɣ wala messus, lameɛna tger-d tinexṣaṣ: yessexṣer-as nniya. Teqqim kra n wussan, tuɣal tuɣ awal n wuccen: truḥ s izem, tenna-yas:
- A lmir n lewḥhuc, serreḥ-iyi ad ruḥeɣ: ɛyiɣ !
Yeɛreḍ yizem ad tt-id-yeṭṭef, ad tt-id-yerr s abrid: iḥawet, yessaged, ur yufi. Tugi : abaden!
Yewwet-itt yerẓa-tt: yenna-yas :
- Ddem, a Ben yeɛqub ad tneṭleḍ !
Yewwi-tt wuccen, yečča-tt, yerna yemceḥ idammen: yefreḥ, yenna deg wul-is: Ussan ussan yelhan qerben !
…. / …. yettkemmil
Yettwakkes-d si FDB ( Le Roman de Chacal) – Brahim ZELLAL – 1964