Tagrest tedhem-d imnaren n tewwura, tegla-d s teɣzi n wuḍan. Ifer dayen yeǧǧa aseklu, yeǧǧa ifurkan-is ɛeryan. Asigna yeffer tafukt, berrik-it wussan ḥeznen, ṭṭlam yesbur akk tamurt, tasusmi teɣli-d ɣef iɣallen. Tremmeg tegnawt tberreq, agu yečča-d iḥerqan, aḍu ikeccem-d ger yelwiḥen n tewwurt, yal iceqqiq ad yettiẓẓif. Tasga n wexxam tsumm-d aman, adfel yers-d ɣef tɣaltin, tudrin akked ugama s temlel dlen. Imdanen yerẓa wegris, regglen iberdan n tudrin, yal wa deg wexxam-is yeqqim.
Akal yeskew aɣurar n unebdu, yerwa aman ugeffur d-yeɣlin. Imezwura qqaren-d : « Tagrest di tmurt-nneɣ, ad tezwir neɣ ad tegri, d acu kan ma tezwar axir wala ma tegra…». Ihi aseggas-a tezwar akken. Ussan imellalen bdan ad tibriken. Tasusmi teɣli-d ɣef taddart, ala ṣṣut n waḍu, d ugeffur i wumi ara nsell.
D acu kan tudert n wass-a mačči am tinna n zik, tbeddel. Aṭas n wansayen i ihudden. Dayen yekkes lkanun, kfant tmucuha. Tagmat ikeccem-itt beṭṭu, tiwaculin yewwet deg-sent iɣisi, yal aɛeggal deg-s yeṭṭef taɣmert deg wexxam yeqqim. Wa yeṭṭef amafus (Portable) gar ifassen-is, wayeḍ d aselkim (ordinateur) ɣef tgecrar-is, ttwaqnen akk ar ugernet ( internet ). Ttwarzen akk ɣer iẓeḍwan inmettiyen (réseaux sociaux).
Ababat yeṭṭef aɣmis deg yifassen-is, yeqqar imagraden (articles), yelha-d d tsertit yettu axxam-is. Tayemmat tessers-d imensi, ulac win yestufan akken ad yečč imiren. Tečča waḥd-s, ur tufi arraw-is s idis-is. Ččan imensi d asemmaḍ, yekfa yiḍ ur yurad dduzan. Yal wa ijebbed iman-is ar tama-s, yettɣimi waḥd-s di taɛcuct-is. Yal taxxamt tuɣal d axxam, yeqleɛ ẓẓerb i tmazirt.
Ur telli tejmaɛt, ur d qqimen yemɣaren. Ur d-teqqim temɣart, ur llint tmucuha. Lkanun yensa, tiqcert tekfa, isufa sbuqquren, ulac win ara sen-yesmendgen. Yerreẓ uqermud di yal axxam, yerreẓ rref, axxam yeččur d irgazen, ulac win ara d-yerren tiqqit.
Fahim MESSAOUDENE
