Tigi d timucuha n wedrar n Jerjer, adrar aberkan, adrar n nnif, adrar n lḥif : akken i s-yenna win n zzman :
i yebɣan lḥerma ad tagar Yali s adrar, Yečč abelluḍ bu tcacit Wi yebɣan irden d tfanṭazit Iṣub s azaɣar Ad yeɣleb agdi d temrit ! Yura-ten ccix Ibrahim Asedqaw di ttnaṣfa n lqern rbaɛṭac, ad yessifes fell-as Rebbi di ddunit, yeɛfu fell-as di laxert ! Amin !
5- Uccen d weɣyul
Imiren yebren wuccen s aɣyul, d nnuba-s. Yenna-yas:
- Atma-k, a bu yimeẓẓuɣen, aha-ten deg udal,di leḥcic ar tɛebbuṭ, rwan asennan d umezzir, da tejɛun, kkaten tuqqra, yiwen ur asen-yettalas, kečč, qqim dagi ad txedmeḍ tacemlit !
Akken yesla weɣyul i yimeslayen-agi, yebra i yimeẓẓuɣen-is, iger-d tinexṣaṣ. Yiwen n yiḍ, s udem n ṣṣbaḥ, yurga yewwi-yas-d Rebbi yella deg udal netta d weɣyul nniḍen, da ttemyekmazen tuyat. Yefreḥ, yendekwal-d seg yiḍes, yufa-d iman-is weḥd-s: tuɣal ddunit deg wul-is d alili.
Iruḥ s izem, tenna-yas:
- A lmir n lewḥhuc, serreḥ-iyi ad ruḥeɣ: ɛyiɣ !
Yeɛreḍ yizem ad t-id-yerr s abrid, ur yufi: aɣyul, ma ifat yeḥren, yekfa umeslay.
Yewwet-it yerẓa-t: yenna-yas :
- Ddem, a Ben yeɛqub ad tneṭleḍ !
Yeskerker-it wuccen armi d iɣzer, yeqqim-as yečča deg-s geddac n wussan. Asmi d-yuɣal, yenna-yas yizem:
- A lmir n lewḥuc, armi d assagi ay kfiɣ tanṭelt n wehdum-nni: mi neṭleɣ fettus, yeḍher-s qejjir;mi neṭleɣ qejjir, yeḍher-d fettus !
…. / …. yettkemmil
Yettwakkes-d si FDB ( Le Roman de Chacal) – Brahim ZELLAL – 1964
