Aɣrum n uḍajin d yiwet n tgella i xeddmen deg tmurt n Leqbayel, d učči i ḥemmlen akk medden. Sewwayen-t ɣef uḍajin; llan wid i as-yeqqaren abufreḥ neɣ sniwa. Ihi acu-ten akk wallalen d yisufar ara nuḥwaǧ akken ad d-nexdem aɣrum-a? Acu-tent takkayin n usewjed-ines?
Di tazwara, ilaq yiwen ad d-iheyyi tabaqit n wuzzal neɣ n usɣar neɣ n wakal, aɣerbal si ara nessif awren, ajeɛɛad neɣ tamessalt, azal n lkas n zzit, kra n lmelḥ, ciṭuḥ n temtunt n lḥelwa d waman.
Ad d-nsif awren-nni ɣer tbaqit, ad as-nesmir zzit-nni, ad as-nernu lmelḥ-nni d wazal n tɣenǧawt tameẓẓyant n temtunt akken ad d-yeww d azewwaɣ. Ad nessexleḍ akk isufar-nneɣ, sakkin ad as-nessurug kra kra n waman akken ad d-nesdukel awren-nni alma yeffeɣ-d d arekti, ilaq ur yetteḥluluy ara; akken kan ara yeṭṭef iman-is ad yishil i umsal, ad t-nesker am ddabex, ad t-neɛrek s yifasen-nneɣ ad as-nkemmel s ujeɛɛad akken ad yilwiɣ wudem-is alma yeffeɣ-d am teḥbult n yiṭij.
Si tama nniḍen, ad d-nheyyi aḍajin ad t-nerr ɣef ufurnu ad as-nessenqes i tmess kra, ad t-nedhen s zzit akken ur yessenṭaḍ ara. Mi d-yeḥma ad neddem taḥbult-nni s leɛqel akken ur tettexsar ara talɣa-s ad tt-nerr ɣef uḍajin. Ad tt-nerju mi d-tewwa si yiwet n tama ad tt-neqleb ɣef tayeḍ; ur tt-id-nettekkes ara alma teffeɣ-d d tazewwaɣt ɣef sin n wudmawen.
Tafrara AT WEJQUQ
