Assenni n lḥedd yezrin, ddukleɣ nekk d temdakelt-iw Tafat ɣer tesnawit. Nteddu s leɛqel iri iri n ubrid nettmeslay ɣef lbak n useggas-a.
Mi qrib ad naweḍ ɣer lqahwa, yettqabalen abrid n tesnawit, yeɛreḍ yiwen n umɣar aderɣal ad d-yegzem abrid, yesferfud s tɛekkazt-is, yettabaɛ akken lǧerra-s; taswiɛt kan almi qrib tḥuza-t ṭumubil i d-yuffgen wissen ansa. Nekk ṭṭfeɣ taɛebbuḍt-iw ma d tamdakelt-iw tettaḍsa almi tuɣal d tazewwaɣt. Sin n yilmeẓyen uzzlen-d ad as-ṭṭfen afus i umɣar-nni ma d nekk ɣliɣ-d ɣef Tafat s ubehdel d ususɣu…
_ Ur tettsetḥiḍ ara tettaḍsaḍ? Tettaḍsaḍ fell-as imi d aderɣal? ɛni yella umdan ikemlen?
_ …
_ Ur d-fukkeɣ ara… amer wihin d baba-m ad testehziḍ akken fell-as? Amer ad yestehzi wabɛaḍ deg baba-m, ad am-yeɛjeb lḥal? Yerna kemm anwa ara am-iḍemnen akka ara teqqimeḍ d tazerqaqt… i amer ad d-tesɛuḍ mmi-m d aderɣal…
_ Baba mačči d aderɣal! iyi-d-terra s ucennef.
_Yyah!!! Nniɣ-am ayen akka txedmeḍ d ayen n diri ur ilaq ara ad testehziḍ deg wayen ur tezmireḍ ara ad t-id-txedmeḍ kemm, ulac win d-ixelqen iman-is akken ad tt-tseggmeḍ akken tebɣiḍ kemm! Akken qqaren “lexliqa n uxellaq, tiyita ur tlaq”.
Ur d-kfiɣ ara ɛad awal-a, Tafat terra deg wayen d-tenna, tuɣal d tazewwaɣt am yirrij n lkanun tban-iyi-d am wakken tendem, tenna-yi-d s wawal d amecṭuḥ “ A Rebbi ur aɣ-d-ttqasas ara”.
Tafrara AT WEJQUQ
