Alɣu !
Tafaska umezgun amaswaḍ (tazrigt tamenzut).
Seg 10 ar 14 Yennayer 2017, di Ssaḥariǧ-Tubiret.
Tamezgunt « Bu tfuset » n terbaɛt Tigawt d wawal » n tiddukla Numidya n Wehran tessukes-d arraz n weḍris amyifi.
S tikkin n tam (8) trebbuyaɛ i d-yekkan si 5 twilayatin :
Tubiret, Tizi-Wezzu, Bgayet, Tamsilt d Wehran.
Mazal lxir ar zdat !…
Tanemmirt.
Ǧamal u Benɛuf (Benaouf Djamal) : D amedyaz, d ameskar n waṭas yedlisen d tmezgunin; akken daɣen i iqeddec deg waṭas n yesmilen s tira-ines. Yesselmed tamaziɣt i wugar n 10 iseggasen, am wakken i yella deffir n tesɣunt « Azul » n Numidya n Wehran. Idlisen : -Timlilit n tɣermiwin, ungal, l’Harmattan, 2002;- Tujjma tuzzma, isefra, l’Harmattan, 2004;- Di tmurt uɛekki, tamezgunt, HCA, 2007;- Taklit n tayri, tullist, asmel imyura.net;- Bu tcacit ulac-it, tamezgunt;- Aneggaru a d-yerr tawwurt, tamezgunt;- Ccix-lkanun, tamezgunt;- Bu tmelɣiɣt d Bu tselɣiɣt, tamezgunt;- Tiɣwist taneggarut, tamezgunt;- Bu yefden neɣ cciṭan di twaɣit, d tasuqqelt n tmezgunt n Tawfiq Lḥakim; - Bu tfuset, tamezgunt...
2 commentaires
Tanemmirt i ǧamal, ɣef wussisen i tettgeḍ deg umezgun. D ayen yelhan.
Dacu kan, ayɣer ur tettuɣaleḍ ara ɣer tira n wungalen, acku d taɣult i di tfazeḍ nezzeh, ddeqs i cekkren ungal-ik « Timlilit n tɣermiwin », ddeqs i yennan belli tarrayt n tira i d-tewwiḍ d tamaynut, llan wid ixedmen tizrawin fell-as. Annect-a yeskanay-d yiwet n taluft: Tesɛiḍ lwehba di tira, d urilaq ad tesɛeddiḍ lweqt-ik deg wayen nniḍen, Acku tutlayt teḥwaǧ aṭas tira imaruten ifazen, a d-ǧǧen agerruj-nsen i tsekla tamaziɣt.
Ayen nniḍen, ilaq ad tɛelmeḍ d akken tira i tettaruḍ d axeddim n welqaḍ. acku, teskanayeḍ-d ccbaḥa n tutlayt, yakk d tezmert n tutlayt. Aṭas n imaruten ur nezmir ad xedmen annect-a.
Wagi ihi i d asteqsi inu ?!
Azul,
Tanemmirt yemmden a Leɛgab ilmend n wawalen-agi-inek d-yettaken afud ula i umeɛlal. Yernu ur uklaleɣ akk azal-a yi-tefkiḍ lemmer ahat ad knunt tuyat-inu seg ijeggigen-a yefsan i yi-d-tefkiḍ!!
Ar imir-a, d imdanen i yeqqaren tira-inek tgerrez, telha, tecbeḥ, tewwi-d amaynut…ger yemdanen-a llan ula d imassanen di tsekla, di tutlayt, deg umezgun…Maca, werǧin nniɣ yiwwas nekk d amaru, neɣ d anaẓur neɣ… Deg idiwenniyen d yeɣmisen neɣ rradyuyat, zgiɣ qqareɣ ɣef yiman-iw d ameɣnas kan, daya.
Tura, ayen yerzan asteqsi-inek, ahat a t-naf ula deg yiwet tririt n dda Lmulud i yennan yiwwas: Ungal d tasekla tasemmaṭ, ur tt-ttidiren yemdanen, maca, amezgun ttidiren-t yemdanen deg tzeqqiwin…
Dda Lmulud d yiwet tgejdit di tsekla tamaziɣt, maca, yura kan kuẓ (4) wungalen, yiwet tullist, snat tmezgunin, ayen nniḍen yakk d anadi deg wennar n tmaziɣt.
Attan tririt-inu:
1) Yekkes-iyi-tt wakud acku yessefk a d-awiɣ aɣrum i tarwa.Mi ara ikerrez wemdan 10 temyar (sswayeɛ), d acu ara s-d-yegrin d ifadden i tira?
2) Ifadden yellan yakk ẓwan deg umennuɣ, sselmed da, nnaɣ da, nadi-yas-d kra i wayeḍ…
3) Ayen uriɣ ar ar ass-a, atan tuli-t takka (aɣebbar), ahat yeɣmel! 7 tmezgunin i yettraǧun asizreg: kra seg-sen ugar n10 iseggasen aya, tiyaḍ ugar n 3 iseggasen aya ɣur tezrigin! Dagi, tban ula i uderɣal! Llan wid d-yeggaren iɛekkiren, ur bɣin a d-teffeɣ teqbaylit si tekwat ideg tt-rran! Acku wwiɣ-d tikta timaynutin, skanayeɣ-d abrid i wid yebɣan ad ddun ɣer yimal.Yernu ur ssineɣ ad sqizzbeɣ!
4) Amek ara yaru wemdan, skud ayen yura atan di tekwat!!
5) Asirem-inu ameqqran, d wa: a d-yeffeɣ yakk wayen uriɣ di talles (ṭṭlam) akken a t-ɣren yemdanen di tafat.
G.M: Lemmer ɣas ad ternuḍ ad testeqsiḍ imedduklal-nneɣ akken a d-fken tidmiwin-nsen ɣef wungal-a acku di tallit-nni yal wa amek yenna? Wa, yenna s wesxertem: tira-inek ur iyi-tɛeǧǧeb ara! Wayeḍ yenna, tennaiḍ-d awal imessḍen, awa-al yessefk ad yettwikkes!
Tanemmirt.