( Tajmilt i imaruten d imedyazen-nneɣ)
S yisem n Σellic nessawal, nura-t di yal d lkaɣeḍ.
Γas tura nga-yas azal, asmi yedder » AWER YAWEḌ »!
Benεuf d Mezdad mazal, ar d awḍen sanda ara naweḍ.
Riɣ kan ad ssiwezleɣ awal, ur ken-ttuɣ a wa neɣ a tayeḍ.
Asmi ara tzedɣem seddaw wakal, agu i ken-yeffren a t-nesfeḍ.
Ahat Kafka ad yekker ad yeẓẓal, a t-yewwet wugur ad tafeḍ?
“ A yemma lmizan imal, a taẓeyt deg-m teṣubbeḍ.
Mass ULAC ur nekkat uzzal, fessus, deg-s tessalayeḍ”.
Afukti uεeqqa n yirden, wissen ma a t-id-taf tmeddit.
S tɣawla i ten-ẓẓaden s tmacinin n ddunit.
Γur-neɣ kra imedyazen, deg waman qqlen am zzit.
Γur-sen isefra zaden, mi ten-uran xemmmen s trumit.
Wid i sen-yernan ifadden, ssuqlen-ten ɣer teglizit.
Walit-aɣ-d tura a medden, ffeɣ si tekwat a taqbaylit!
A nnger, anwa i k-irefden? Cḍeḥ yid-s a tawaɣit!
Sliɣ i ccix la itedden, ssurfet-iyi, d lawan n tẓallit!
Ihi a d-nuɣal s ameslay, aql-i dεiɣ-awen-d s lxir.
Sliɣ s yiwen wemsefruy ɣlay, asefru-s am wefrux i yettṣeffir.
Yura-t ger Paris d Marseille, azwel-is » CCEMMA N DEFFIR ».
Sres-aɣ-d abṛiq n latay, aql-aɣ neddenden ur neskiṛ!
Anwa i nerra akka d amnay? A tidet berka ttmesxir!
Di Rebellat nessalay, ɣumm-iyi ay akal, ttifxir!
Cnu-yi-d tizlit n rray! » YA BEXT-I, YA ΣEMR-I CTA NDIR »?
Ay allaɣ ɣef yiles ẓẓay, jmaεliman ur d-yensir!
Γumm-iyi ttxilk ay akal, ḥareɣ fell-i ad yekker zzhir!
Ahat kra n yiwen a d-yemdekwal, a t-yekcem ass-nni lḥir?
Fell-i a d-awin awal, ad as-inin » YEĞĞA-D ZDEFFIR ».
Ad ttun akud yettɣawal, ad ttun ččan-iyi lxir.
Ul-iw fell-i ur yessawal, aya mačči d ttmesxir.
Ttmeslayeɣ ɣef dda Ğamal, ɣummen-t imi ur yenɣi, ur yukir.
Amek ara ɣ-yelhu yimal, tismin-a ma yella ur tent-neffir?
Ajeğğiḍ-nsent yugar winna n lmal rnant tuɣmas am ddkir.
Sεid At Mεemmer
3 commentaires
Azul,
Asefru-ya s wazal-ines imi d tajmilt s wazal-ines ideg yerra tajmilt i imaruten d imedyazen-nneɣ; si tama-inu a s-rreɣ tajmilt xerṣum s yiwen uwezwaz zdat n wayen yuklal umedyaz-agi-nneɣ ameqqran « SɛiD At Mɛemmer » . Sɛid At Mɛemmer mačči d cwiṭ wayen iga i temsalt-agi-nneɣ, kra imedyaten kan:
– Yura, u yessazreg-d kuẓ isidiyen n tmedyazt, yernu si texriṭ-ines.
– Yessazreg-d ahat lewhi n 15 yedlisen, ger wungalen, timucuha d wammuden isefra.
-Yella d yiwen wemsermed agejdan deg wesmel « imyura.net ».
– Aṭas n yemdanen, imussuyen, tiddukliwin i yull (iɛawen)….
ɣas yettidir di tmurt n Lalman i tallit n wugar n 30 iseggasen-aya, maca, taqbaylit tezga deg wul-ines acku seg wid yewwet laẓa s aqerru mačči s aɛebbuḍ.
Di taggara n wawal-inu, la s-ttbudduɣ tazmert, talwit, u ad mmden yakk isenfaren i wuɣur yessugum.
Tanemmirt.
Awlawal seg Wehran
tanemmirt ɣef tinigi-agi
nekk s tidet ur ssineɣ ara argaz-agi, sselleɣ kan yis-s. lemmer a s-tgeḍ amagrad yili axir a t-issinen medden ugar. D tagi i tawaɣit-nneɣ, ttlalen-d yergazen d tlawin, xeddmen, ttmuddun lɛamur-nsen feljal tmettit, ardeqqal ur ten-nettissin ara, ur nettissin ayen xeddmen, ur nessawaḍ izen-nsen, ur nessawaḍ i medden ayen xeddmen. Iban-iyi-d ma nḥeqqer akka imdanen am wi, amek a ɣ-gen medden leqder.
Tis snat, asmel-agi, iban-iyi-d d adeg iwatan ideg nezmer a d-nesken tudert d uxeddim n yemdanen-agi. annect-a d awwar (lwaǧeb) fell-aɣ,
Gma-tneɣ Leɛgab azul d tnemmirt.
D tidet i d-tenniḍ, ur nettak azal i wid t-yuklalen! Akken t-yenna akken Lewnis At Mangellat deg wawal-is:
« Aqelmun n ṣṣber nerra-t, nuki-d ṣṣbeḥ tbeddel;
Ccmayet tthuzzun tuyat, war laṣel yezga ifettel
….
Ma ur nbeddel ara tikli-ya d-newwi ad aɣ-taẓay tɛekkemt ssya d afella.
Ussan-a yezrin i s-uriɣ, nniɣ-as ɣef wesmel-a akken ad yaru deg-s. Ɣas ussan-a yettwaṭṭef s tlufa, maca, yefka-yi-d amtawi-ines akken a d-sserseɣ kra umagrad neɣ adlis-ines da.
Dɣa ad zwireɣ deg idiwenniyen i yefka i kra n yeɣmisen, akken a t-issinen imeɣriyen n Tafukt, ssyen a d-srusuɣ imagraden-ines…
Tanemmirt a gma-tneɣ Leɛgab, a gma-tneɣ Leɛgab tanemmirt.