tafaska n tmedyezt

Timlilit n temdyezt d tajmilt i Ssaɛid Ɛettab si 13 ɣer 17 yunyu 2016 deg At Lqasem, Taɣiwant n At Si Yusef

“Qqaren at zik win ur nezmir i lxir yerr areṭṭal” netta ladɣa lxir ur yettwarḍal ara, ala win yellan d aḥerri i yessnen d acu i d azal n lxir, d win i yettakken azal i lxir, win i t-igan yettu-t, ad as-d-yuɣal seg wansi akken ur yebni ara, ayen ara s-yernun deg wazal d ucebbuɛ i bab-is izeggir-it yisem-is ɣer wanida yerra.
Tafejrit newwi abriḍ ɣer At Lqasem, Dda Buɛlam Messusi akk d Ccix Malek Ḥud d imyura d imedyazen i sin, ala nekk i yellan gar-asen, ɣas ḥseb-iyi kan d amsedday n tkerrus. abrid newwi-t s lewhi, maca, cfiɣ yiwen useggas akken tesnubga-yaɣ-d yiwet n tiddukla deg tama-nni, d aymi yusa-yi-d webrid amzun akken cfiɣ fell-as. Newweḍ ɣer taddart tamenzut, waqila isem-is Bunuḥ, ssyin newwi abrid s lewhi, yal abrid ara naweḍ ad neḥbes .ma yella win ara d-iɛeddin ad t-nesteqsi sani i d-abrid. Ulac ula d yiwet n limara neɣ taplakt, d tisewham ! alammi newweḍ ɣer Buɣni, newwet a d-nerr d akessar, imi nesteqsa yiwen yenna-yaɣ-id :ad nuɣal d sawen, ssyin nesteqsa wayeḍ, yenna-d nekk tedduɣ ɣer Wat Si Yusef, ma yella ad teglum yes-i dɣa abrid nufa –yas-d amek. yedda alammi d At Si Yusef, newweḍ ɣer Wat Lqasem.

imi limarat i ɣ-d-yefka sṣawḍent-aɣ alammi d din. At lqasem tezga-d ɣef yimi n wedrar, d nettat i d taneggarut, tsenned s adrar acebḥan. yezdi yixef-is, yuɛla deg tegnawt. amzun akken yettẓalla s ibeddi, ur tbeddlen wussan akken bɣun ssemɣin-d tazmart, netta yeṭṭernenin, ireffed ixef-is. lefjiɛa n terwiḥt, ufiɣ taddart sneɣ-tt, necdeɣ-d yakan tarbaɛt n umezgun d ccna d ccḍeḥ-nsen, ziɣemma d taddart n Mhamed n Buɣni akken i as-semmaɣ. d tama ideg yella Salem Amran, amsedrar d Yusef Ɛacuri. Tzad wi izaden, imi d-yejba Ssaɛid Cemmax, temlal tasa d way turew, izad wi izaden, msawalen wulawen-nneɣ, tagmat-nni tabaḍnit wa ur yebni ɣef wa. maca nufa-d iman-nneɣ udem s udem .allen ɣer wallen, nefḍer, nedda ɣer uẓekka n umerḥum, win i wumi rran tajmilt, ssyin d abrid ɣer tewwurt n lɛinṣer, neɣ ad as-semmiɣ adrar bu tewwurt taqeblit. nekcem ɣer tadist n wedrar yellin imi-s, yeẓẓel-d ifassen-is. taddart n At Lqasem deg yisem-is ahat meẓẓi, maca win ara d-yasen ɣer din, ad as-d-tban meqqert. akken i d-mudden udem warraw is, ama deg tezdeg, ama deg umager, ama deg wecmumeḥ. udmawen bedden am yiwen anɛam, yirbeḥ amzun akken deg tuddar-nneɣ i ɣ-yuɣ. Ur nḥus ara d akken d lbarrani.

Ayagi merra ugar ɣef temlilit n tmedyezt tamenzut. Usan-d imedyazen yuklalen tajmilt tameqqrant, imi d-llan d inigan n tlalit. yiwet n tegnit nniḍen, i nutni ad asen-yettunefk wawal. ahat diri-tt i widen akken i tellin deg yimawen-nsen, widen yessawalen i yimedyazen d akken, ur ttruḥun ara ar temliliyin n tmedyezt, widen i d-ifettun, yerran iman-nsen d imussnawen. Tbeggen-d tegnit-agi udmawen-nsen n tidet ama d imedyazen nessen, ama d wid ur nessin ara. maca timlilit tamenzut, akken yebɣu yili tgerrez. imi am wakken qqaren mazal lxir ɣar sdat. Imedyazen n tidet ur nettak afus deg tmedyazt, d widak ara iberrun i waruz yurzen tamedyezt. Ur tettuɣal ara d ayla n yiwen, yessek fell-asen a tt-id-ssuffɣen ger ifassen n iɛebbajen n wawal, ur nefhim awal. a tt-id-kksen seg ifassen n widak yerran iman-nsen faqen, bennun, ḥercen, ladɣa d ahuddu i tt-huddun.

Akli n tamazirt seg weqbu