Ur d awen-qqareɣ diri
Ad nessusem neɣ a d-nehder
Am tin d-yusan si tniri
Allen-is glant-d s uɣebbar
Ufiɣ-d yessa webruri
Adfel idel-d akk adrar
Annect-a yakk yura ɣef yiri
Xerṣum ad nessufeγ aεbar
Ad nessufeɣ aεbar ur nettwexxir
Tirṣaṣin d imeslayen
Di teẓgi ad yekker uhetwir
Mi ara s-d-slen wuccanen
Ma faqen yuli weswir
Ad agaden ad mbiwlen
Dɣa ma ur d-yegri wuffir
Gar-asen ad myeččen
Neɣ xerṣum ma lhant tirga
Ad aɣ-yiẓid usirem
Ad nettargu ad neɣḍel imerga
Deg iḍudan-nneγ ad nderrem
Mi nεedda seddaw terga
D « yyaw sanda ara terrem ! »
Ad asen-nruḥ duga duga
kra i ɣ-iruḥen a t-id-neɣrem
Tamacahut ihi d ta
Dagi a tt-fakeɣ s uɣiwel
Ameṣmar anda yenta
Anza d acu a d-iniwel
Awit i wuccen taciṭa
Sbuḥrut-as ma ur yembawel
Ur d as-zeggit taseṭṭa
Skeεwiwet mi ara d-yessiwel
Djamila Ait Boudrar
Un commentaire
Azul,
Tamedyazt-a d tin yettleqqimen taqbaylit, d tuẓwirt, gedha yes-s!
A tt-naf d lall n tekti lqayen, yernu tessen amek i tsenni tifyar; ugar ɣef ccbaḥa isefra-ines!
A wi yufan ad ggtent tmedyazin yettaken azni ɣur-s!
Awer d as-kkawen ifadden acku abrid-agi yessawen, yernu yenneḍ yezzi!
Tanemmirt