Argaz d uferruǧ n tsekkurt

Yiwwas deg wussan n unebdu, ruḥeɣ ɣer temdint n Iɛeẓẓugen, seg wakken yeḥma lḥal mačči d kra, dɣa wwiɣ abrid-iw, ruḥeɣ ɣer teẓgi n Iɛekkuren akken ad sganfiɣ dinna. Ruḥeɣ s ukerrus, lḥiɣ alarmi ttmagareɣ-d tiberrakin-nni anda znuzuyen aqellal, iḍujan, tiḥellabin, tiḍebsiyin uqellal, tirbutin d waṭas n tɣawsiwin nniḍen. Abrid yeččur d tiberrakin, ddaw webrid, nnig webrid. Settfent ta deffir ta, alarmi d i mi wwḍeɣ ɣer yiwet n tala rrif n webrid, ɣef uyeffus-inu. Ḥebseɣ dinna, ufiɣ tikeryas qwant, am uweṭṭuf, qrib azgen n tsaɛet ur d-ufiɣ ara amkan anda ara ḥebseɣ takerrust-iw.
Lɣaci yeččur ddunit. Ffudeɣ, ruḥeɣ tedduɣ ɣer tala-nni ad d-sweɣ, ufiɣ lɣaci bedden wa deffir wa, ttraǧun deffir n ucercur n tala, yal wa yettraǧu nnuba-s ad t-id-taweḍ. Rǧiɣ nnuba-w ula d nekkini am lɣaci-nni. Imi wwḍeɣ s aqemmuc n ucercur ssardeɣ aqadum-iw, rniɣ kkseɣ acayaḍ n ffad-iw, aman-nni d isemmaḍen ttarran-d tarwiḥt i wemdan. Abeḥri n dinna d asemmaḍ, beddeɣ rrif n webrid, dinna kan rrif n tala-nni. Mmuqleɣ zelmeḍ, walaɣ yiwen n wergaz isewway. Di tsewwayt-nni-ines yettali-d wabbu d amellal, d acayaḍ, iban kan akka d aksum i yesseknaf, yettraḥ-d d aẓidan, imi-w yebda yettarew-d imetman. Qqerbeɣ, ufiɣ argaz-nni yesseknaf iferraǧ n tsekkurt, walaɣ yiwen n wemdan ibedd dinna rrif n tsewwayt-nni, yettraǧu, beddeɣ akken deffir-s ttraǧuɣ ula d nekk. Akken yewwa uferruǧ n tsekkurt, yefka-yas-t-id i winna di tseḥfit, yerna-yas-d tiḥdert n weɣrum, winna yeṭṭef amkan-is dinna, yebda itett. Tebɛeɣ-t s tmuɣli alarmi d imi yeqqim, dɣa rriɣ-d allen-iw ɣer wergaz-nni isewwayen. Mlalent wallen-iw d wallen-is, yessefrawes-iyi, dɣa yenna-yi-d : – Azul fell-ak, tebɣiḍ ad k-d-zelfeɣ yiwen ? Hucceɣ-as aqerruy-iw, nniɣ-as : – Ih. Ttmuquleɣ-t kan amek yettnawal, ṭṭafareɣ-t s wallen-iw, walaɣ-t yezzi iruḥ ɣer lqus yeččur d iferraǧ n tsekkurt, kmumsen akk ɣer yiwet n tama, am wakken yerẓa-ten usemmiḍ. Akken kan iger afus-is wergaz-nni, dɣa mfarragen akk, aferǧiǧew ula anida. Kmumsen ttergigin, wa i teffer deffir wayeḍ, akken ur t-id-yettaṭṭaf ara ufus n wergaz-nni. Muqleɣ-ten, muqleɣ argaz-nni, waleɣ-t yeddem-d yiwen n uferruǧ deg ufus-is, tafruyt deg ufus-ines nniḍen. Abbu-nni n tqerrumt n uceṭṭub ireqqen di tsewwayt-nni yesru-d allen-is, walaɣ-t yessers aferruǧ-nni ɣef tgezzamt, yezla-t, yessencew-it, yezlef-it, yessared-it, imelleḥ-it, dɣa yessers-it ɣef targin n tsewwayt-nni ad yeww. Muqleɣ iferraǧ-nni iḥebsen sdaxel n lqus, nniɣ-as deg wul-iw : – Tura widak-ihin akk, ad mmezlen d tirni, yal wa s nnuba-s, yerna wa yettwali di gma-s amek i s-teḍra. Mazal-iyi beddeɣ kan akken, ttmuquleɣ-ten iẓri-w yeččur-d d imeṭṭi. Yewwi-d Yillu ṣṣut deg yimeẓẓuɣen-iw, sliɣ-as i yiwen uferruǧ yenna-as i wayeḍ : – Argaz ihin tegzem tasa-s fell-aneɣ, tura ad aɣ-yeḍleq, ad aɣ-yebru, twalaḍ imeṭṭi-ihin ɣef wallen-is. Yerra-yas-d wayeḍ-nni, yenna-yas : – Ur ttmuqul ara s imeṭṭi n wallen-is, muqel ayen ixeddem ufus-is. Sliɣ i yiwen yettlaɛi-yi-d, dduqseɣ-d. Ziɣ d argaz-nni, yefka-yi-d aferruǧ-nni yewwan di tṣeḥfit yerna-yi-d tiḥdert n weɣrum, qqimeɣ ad ččeɣ.

Yerra-tt-id ar teqbaylit Fahim MESSAOUDENE

Tukkist seg wammud n tneqqisin/tullisin « Timsirin n Ddunit »