di lmux n wuccen i yettili ddwa

 

Di tallit anda ssawalen waxuten d iɣersiwen, yella wuccen yenzef si laẓ, ur yufi ayen ara iger s imi, iteddu deg webrid yettmal ur iqeṭṭeb ara iman-is, seg wakken yelluẓ mačči d kra. Iteddu yemlal-d inisi. Inisi mi t-id-iwala deg waddad am winna yenna-yas:

– D acu akka k-yuɣen ay uccen? Liḥala-inek ur tessefraḥ ara.

– ixuṣ-iyi, aqla-i acḥal aya ur ɛriḍeɣ taḥerrit.

– hahaha d ayagi kan?

– amek ixuṣ waya ?

-ma tebɣiḍ ad teččeḍ ar terwuḍ ad ak-mleɣ amek ara txedmeḍ ?

– aha ɣiwel ini-d, d acu tettraǧuḍ ?

– ad ak-mleɣ yiwet n tebḥirt deg-s tiẓurin, lexrif, kečč d ayagi i tḥemmleḍ.

– Wellah am wakken tkecmeḍ s ul-iw, teẓriḍ d acu ḥemmleɣ, fakk awal-ik, ɣiwel awi-yi ɣer tebḥirt-agi.

-hat tebḥirt-inna, mi tewwḍeḍ ɣer-s, zzi-d i zzerb-ines, ad tafeḍ yiwen uṭerṭuj d amejṭiṭuḥ ( amkan anda yeqqers zzerb), mi akka telluẓeḍ xass meẓẓi, ad tizmireḍ ad tɛeddiḍ.

– lameɛna mi ara ččeɣ ad rwuɣ, ahat ur ttizmireɣ ara a d-ffɣeɣ seg uṭerṭuj-nni, acku ad icuf uɛebbuḍ-iw ad afayeɣ.

– hahaha, ur teẓriḍ ara amek ara txedmeḍ ?! ula d tagi teɛreq-ak ?

– nniɣ-ak aɛebbuḍ-iw yekkat abendayer, ur zmireɣ ad xemmeɣ ɣef wacmema.

– ihi mi tkecmeḍ, teččiḍ, terwiḍ, mi tesliḍ yusa-d bab n tebḥirt, err iman-ik temmuteḍ, mi d-yewweḍ ɣur-k ad iɣil d tidet temmuteḍ, a k-yeṭṭef si tqejjirin, a k-id-iḍeqqer ɣer berra ad as-yini:« win iwumi temmut lǧifa ad tt-id-iḍeqqer ɣer tebḥirt-inu»

Uccen yesnemmer inisi, iruḥ yexdem akken i d as-d-yenna. Yekcem ɣer tebḥirt-nni yečča alarmi yerwa, yerra iman-is yemmut, mi t-id-yufa bab n tebḥirt iḍeqqer-it-id ɣer berra. Yefreḥ d ayen kan, yuɣal iteddu deg webrid icennu yettnecraḥ. Deg webrid-ines yesla d akken agellid yuḍen yenṭer. yugad ad yerfu fell-as acku merra iɣersiwen d waxuten ruḥen ad t-id-ẓren, mazal kan netta. Mi yiwweḍ sdat ugellid yezzul fell-as:

-suref-iyi ay agellid, aql-ak ur sliɣ, tura imi sliɣ aqlih usiɣ-d yerna ad ak-mleɣ ddwa ara k-yesseḥlun.

Imciwren ugellid akken ma llan, ddwa, ddwa, aha ɣiwel nṭeq-d acu-t ddwa-agi ?

– ddwa ugellid-nneɣ d idammen inisi.

Din din uznen wwin-d inisi. Uccen iɣil d ayen inisi ad yemzel.

Cwiṭ kan atah wwin-d inisi,

– Ay inisi, nnan-aɣ-id- d akken idammen-ik lhan i ddwa.

– d tidet lhan, lamaɛna mačči weḥd-nsen.

– s wacu ihi ?!

-ilaq ad xelḍen di lmux n wuccen.

Uccen din, din tbeddel ṣṣifa-s, yeẓra ulac tarewla ad yemmet;

Wwten uccen ɣer tṣegnint, yeɣli-d lmux-ines ɣer lǧefna.

Yenṭeq inisi:« ax jreḥ tameẓẓuɣt-iw a d-ffɣen ciṭuḥ idammen, acku ciṭ kan i ilaqen »

 

Uccen yettu lxir i d as-yexdem yinisi, mi akken yella yelluẓ, yerna yundi-yas akken ad yemmet, di taggara d netta i yemmuten.

Yusef Ɛacuri