Yennayer d aggur amenzu n useggas n Imaziɣen, d ansay yellan deg waṭas n tmura anda ttidiren Imaziɣen deg ukuz n tɣemmar n ddunit. 950 n iseggasen send talalit n Sidna Ɛisa, Cacnaq, agellid Amaziɣ, ad yesbedd tagelda-ines tis 22 di tmurt n Maṣer, aseggas-nni ideg i yerbeḥ ugellid-agi amaziɣ ṭṭrad-ines gar-as d Iferɛunen. Azal 235 n iseggasen d Imaziɣen i yesselḥuyen Tamurt n Maṣer. Seg yimir-nni i bdan Imaziɣen ḥessben ussan, yebda uwitay n Imaziɣen. Ad naf yennayer yebḍa ɣef sin yeḥricen, amenzu n yennayer : i umi neqqar daɣen tawwurt n useggas akked Lɛezla n yennayer, d ass wis 15.
Mazal ar ass-a imaziɣen sfuggulen yennayer. Yal tawacult tettmagar-it s imensi n bu sebɛa isufar, n useqqi aquran : irden, tajilbant taqurant, lubyan bu timmi (lubyan n leqbayel), talubyant tamellalt, ibawen, lḥemmeẓ, leɛdes. Timezla n iyuzaḍ, maca ilaq ayaziḍ ad yili d win n tmurt, d bab-is ara t-id-yessekren deg wexxam-is, ad t-yefk d asfel. At zik akka ! Ad naf yal axxam yettheggi imensi n yennayer. Ass-nni ɛerḍen-d tiwelliyin-nsen akken ad ččent deg yimensi-nni, d azamul n yiseɣ akked tegmat. Iɛeggalen n wexxam, mi ara qqimen ad ččen imensi. Amɣar n wexxam akked wergaz ad ččen tidmarin, acku d netta i ixeddmen ɣef wexxam. Arrac tetten timeṣṣaḍin akken ad imɣuren ad grurzen. Tullas tettent tafriwin, acku yiwwas ad srifgent seg wexxam, ad zewǧent. Tamɣart akked tmeṭṭut tettent ayen d-yeqqimen deg uyaziḍ-nni, ttsummun-t iɣsan.
Tulawin, sewwayent daɣen tiɣrifin, tiḥbulin (lesfenǧ), skarayent aɣembabu n ucayaḍ deg tenwalt, qqarent : « Acayaḍ i tekkes acelyaḍ ». Daɣen ttkeḥḥilent i timmi-nsent d wallen-nsent s imeṭṭi n uzzu, ssirident leḥwal n wexxam, tezzint-d i wexxam s tseḍwa n yilili (taseṭṭa n yilili agellid), ttezraqent tisgiwin n wexxam. Tekksent inyen n lkanun n useggas yezrin, ttɛawadent imaynuten. Ilmeẓyen tteffɣen ɣer izenqan, s ignan n taddart, tturaren.
Urar yettwasnen s waṭaṣ, d « amɣar n uceqquf », yella wanda nniḍen qqaren-as «Buɛfif » di kra n temnaḍin nniḍen qqaren-as : « Ayrad », d kra akken n yiselsa akked tgelmusin (masques) i d-xeddmen s teqrucin swayes ssenduyen ayefki. Yal ilemẓi ad yerr tagelmust i uqadum-is ad teddun ad cennun, ad sṭebṭuben ɣef tewwura n yixxamen n taddart, yal tameṭṭut ad ten-id-temmager s taḍsa, a sen-d-tefk taɣawsa tebɣa, ta d idrimen, ta d timellalin, ta d aɣrum, …
Di lɛezla n yennayer, deg wass wis 15, tettili-d ttesḍila i igerdan. Igerdan ur newwiḍ ara aseggas asen-kksen kan ciṭuḥ i temzurt-is. Itekkes-as-tt umeqqran n wexxam, qqaren-d akken ad yiɣzif leɛmer-ines. Igerdan iɛeddan aseggas ttseṭṭilen-asen akk acebbub-nsen (acekkuḥ). Imekrazen (ifellaḥen) si tama-nsen tezzin-d i yigran-nsen s ujeǧǧig n yilili.
Fahim MESSAOUDENE
3 commentaires
ifadden izwiren a Fahim,, i$drisen-inek, ttaken abeḥri i turett, skud kkan wid-ik yecban nezmer a d-nini am akken Muḥya, mazal lxir ar sdat tanemmirt ahuddu ahunnu fell-k.
Tannemirt-ik, a Youcef ,
Ma mačči d nekk, d kečč d iqbayliyen ara yarun tutlayt-nsen,,,, anwa ihi ara tt-yarun ?
ittuḥettem fell-aɣ ad neddem aqabac ad nessekfel, ad naru
tikwal neqqar d tidet tikwal n tuggwad it tikwal n teffer it n ssermal it xas ma nezra anda wlac tidet ulac tudert
nhemmel ad n wali idelli akken i & yehwa netraju ass a ar d yu&al d idelli akken ad nehder fellas akken & ihwa axater ur & ihwara wassa ur & ihwara wamek nu&al akka yerna nessaram i wzekka ( amezruy d abrid n tidet ,d anagi ggizri ,d asafu ggimal) m d yennayer d yenayerat yal tasuta ahat s yennayer is.