ḥekkun-d ɣef zik-nni d akken yella yiwen wemɣar netta d temɣart-is, ddan ciṭuḥ di leɛmer, amɣar d netta i d-izedmen, acku isɣaren i usewwi d useḥmu uladɣa deg wussan d wuḍan n tegrest. Ma yella d tamɣart tlehhu-d s leqdic deg wexxam. Yiwen wass amɣar yeɣli-d deg waṭṭan yeṭṭef usu. Ass-nni yettuḥettem ɣef temɣart akken ad truḥ ad d-tezdem deg wemḍiq n wemɣar-is. Mi tewweḍ ɣer teẓgi tebda tettqeddir, iwala-tt-id yizem, ifaq d akken ur tessin ara i ccɣel-agi, iqerreb-d ɣur-s iɛawen-itt-id. yezdem-as-d yerna iɛebba-tt-id ula d nettat alarmi d axxam. Tekcem s axxam-is iqubel-itt-id wemɣar-is yenna-yas :
-amek tuɣaleḍ-d ! ur tɛeṭṭleḍ ara !
-ih, limer ad teẓreḍ ufiɣ ɛemmi izem di teẓgi, d netta i yi-d-izedmen, yerna ibubb-iyi-d nekk d tezdem n yesɣaren, acu kan « nnefṣ-is yettfuḥu »
Izem tuɣit lḥal mazal ur iruḥ ara, yesla-d merra ayen d-tenna temɣart. iɣaḍ-it lḥal aṭas, aṭas, mi yesla i wawal-nni « nnefṣ-is yettfuḥu »
Izem yekker iruḥ, yiwen wass yemlal d temɣar-nni, iqerreb ɣur-s yenna-yas:
– Wwet-iyi-d s tqabact-nni-inem ɣer ger wallen, neɣ a kem-ččeɣ.
– Awwah amek ara k-wwteɣ, kečč txedmeḍ deg-i lxir nekk a k-wwteɣ s tqabact !
– Nniɣ-am wwet-iyi-d s tqabact-inem neɣ a kem-ččeɣ, awal d win i wumi tesliḍ.
Tugad, tekker tewwet-it s tqabact ɣer ger wallen.
Zrin kra n wussan mlalen tikkelt tayeḍ, iqerreb-d ɣur-s yenna-yas :
– Aha ziɣ wali ma yeḥla lǧerḥ n wass i yi-tewwteḍ s tqabact ɣer ger wallen ?
– Yeḥla, yeḥla ur d-yegri ula d acemma.
Yerra-as-d yizem : « yir leǧruḥ qqazen ḥellun, yir lehdur qqazen rennun »
Un commentaire
Azul,
Taqqsett a yi telha atas yerna ts3a lma3na tamuqqrant . Slighass imi ligh meziagh achal tekelt, lam3na d tewsit tangarutt qqaren:
—- legreh yeteqqed yehalu, awal yeqqaz yernnu……….
PS: yeteqqed veut dire soit rôtir ou bien guérir petit à petit (mijoter).
……………….tanemmirt………………….