D acu i nebɣa sdeffir n weɣmis-agi umḍin(journal numérique)? Mačči d isalan ijdiden yettakren tiṭ n wid ara ten-yeɣren i nettnadi. Aɣmis-agi, nebɣa-t kan d amkan i tira. I tira isehlen, timserreḥt, i tekti tazedgant ɣas d taḥerfit, ɣas d tamectuḥt. Nebɣa ad nefk tagnit i yal yiwen yebɣan d yaru neɣ ad iɣer s tmaziɣt anda ma yella akken a d-yini ayen i t-iceɣben s tutlayt-is. Ma ur yezmir ad yaru, yezmer ad iɣer. Yezmer daɣen ad d-yefk rray-is ɣef wayen i d-uran wiyaḍ. Aɣmis umḍin(numerique) d allal i izemren ad yaweḍ anda ur yettaweḍ lkaɣeḍ imi ttawil n internet ad t-naf di yal amkan. Llan wid yettarun meḍlen ayen uran di terkent! Ulac win i sen-yeqqaren!Ulac win i sen-d-yeqqaren ma yelha neɣ ixuṣṣ! Llan wid i izemren ad arun ur ufin ara anda! Llan wid i yebɣan ad ɣren s tmeslyat-nsen ayen i ttxemmimen wiyaḍ, meɛna ur t-ufin ara! Llan, llan….
Nebɣa s tira, tikti meẓẓiyen ad timɣur, ad tefrurex u ad tuzur. S tira, ad nelmed tira. S tira ad nelmed amek ara nebḍu d wiyaḍ ayen yellan ɣur-neɣ. S wakka i nwala nezmer ad ntekki, ɣas ma s cwiṭ, deg unefli n tmeslayt d yedles-nneɣ. Anda tebɣuḍ tiliḍ, aru tiketwa-k s tmeslayt-ik, ɣer i wiyaḍ tefkeḍ-d rray-ik. Awal awal ad nebnu aḍris. Aḍris aḍris ad nebnu aɣmis.
Yazid O.
2 commentaires
tanemmirt i gma-tneɣ lyazid. D tidet, ayen i d-tenniḍ d iswi ameqqran iɣef nekkat. Ilaq aɣmis-agi ad yili : d akatar i tutlayt tamaziɣt di Internet, d amkin anda ara nɣer u naru s tmaziɣt akken iwata, d amkan ara yaf uselmad d unelmad iḍrisen i si ara iheggi timsirin-is, akatar i si ara nesken i wiyaḍ d akken Tamaziɣt tettwaɣer u tettwaru am tutlayin nniḍen, d akatar i si ara nesken i wiyaḍ belli nezmer a naru s tmaziɣt di yal taɣult… d akatar ara d-yernun aṭas i Tmaziɣt.
Wigi d kra yeswiyen ger wiyaḍ uɣur ilaq a nwali s talqayt, i wakken ad nseddu lecɣal akken ilaq, u ad yili yimal ijuǧǧgen i ukatar-agi
Azul,
D awal n lɛali d-yenna wergaz-a n lɛali! Akken qqaren « Asuurif n nnif, yessufuɣ si lḥif ». S uɛeqqa i ttemmed tirect.
…
Sliɣ ad yili yiwen wermud ɣur-wen tameddit. D ahanay umezgun ara yilin ɣef 17 (t),15. Yelha lemmer d-tessersem isali-ya dagi acku ula d tamezgunt m weḍris yufraren d taɣuri, d asihrew n tutlayt…
Afud anezmar i telmeẓyin d yelmeẓyen yellan di terbeɛt-nwen umezgun. Maca, akken t-yenna akken ucennay Zdak Lmulud:
» Wi d-yusan telha tsunẓut, wi iruḥen ur t-ḥbiseɣ ara;
ccna-w mačči d taḥanut, ssali tṣubbeḍ di ssuma;
ccna-w d tamacahut, meli nnudmeɣ tekfa;
Ma qqnent wallen dayenni ».
Tanemmirt