Tira n tlata n yidgan d tsuda s tmaziɣt
Yegla-d useggas amaynut n yimaziɣen s kra n wayen yelhan i tutlayt n tmaziɣt, ur yeqqim ara kan deg ccna, imi tger tutlayt yiwen n usurif ɣer sdat s tira n kra tsuda (institutions) s tmaziɣt.
Ma neddem-d amedya n temdint n Wehran, ad naf ttwarun ukkuẓ n yidgan s tutlayt n tmaziɣt, kra deg-sen d timerniwt, imi tella yakan tira s taɛrabt, rnan-as tin n tmaziɣt. Ma d kra-nniḍen, d tikkelt tamezwarut ara tettwaru deg tsuddut yecban aɣerbaz.
Ass-nni n 12 deg yennayer dɣa, d ass aneggaru n temsikent n tddukkla Numidya, ifures tagnit uselway n tddukkla-a, d kra n yiɛeggalen, ddan akked lwali n Wehran Mass Cerifi Mulud, d yiɛeggalen n Useqqamu awilay d wudmawen d yimasayen-nniḍen n yidles s uneḥḍur iǧehden n yiɣallen n laman, gan yiwen wass i lmend n wayagi.
Bdan taṣebḥit n wass seg uxxam n twilayt n Wehran, anda i rnan tira n tmaziɣt i teplakt-nni n lwilaya, d tin i yessunẓa Mass Cerifi s timmad-is. Syin, ṭṭfen abrid-nsen ɣer tddukkla Numidya, anda i gan yiwet n teplakt d tamaynut, deg tewwurt n berra, tettwaru s tmaziɣt d taɛrabt. Tameddit n wass, d abrid i ten-yewwin ɣer tama n Ɛin Bayda, fkan isem n umjahed amyaru Abdellah Haman i yiwen n uɣerbaz alemmas dinna. Uqbel ad kfun tuzzya-nsen ɣer umraḥ n tkatidralt, s uneḥḍur n twinas n yimdanen, acku din i tella temsikent n tddukkal ɣef yennayer (d ass aneggaru), anda i fkan isem n “Azniq n Kahina” i umkan-nni, mbeɛd mi yella zik “Place Jan darc”.
Yiwet n tmawat, d akken merra tiplakin ttwarunt s yisekkilen n tfinaɣ anagar tin n tddukkla Numidya i yettwarun s tfinaɣ akked tlatinit qer tama-s. “Ahat mačči deg yisekkilen i d-teggra, lḥasun tettban d tamaziɣt, ladɣa ma walan-tt yimseɛraben, ad ẓren belli azal n tutlayt n Mɛemmri yebda yettaṭṭaf amkan-is deg tmetti”, i ɣ-d-yenna yiwen n urgaz aqbayli i d-yusan ad yeḥḍer dinna. “Leqdic-agi d asurif ɣer sdat i temnaḍt n Wehran, d asurif meqqren ladɣa i tmazɣa, d tuɣalin ɣer tadra”, i d-yerna yenna-d yiwen n yilemẓi asdawan.
GM: amagrad-agi yeffeɣ-d deg weɣmis la dépeche de kabyle n wass 21/01/2019, ataya wassaɣ ar umagrad deg weɣmis:
https://www.depechedekabylie.com/ddk-tamazight/tira-n-tlata-n-yidgan-d-tsuda-s-tmazi%C9%A3t/?fbclid=IwAR2Fe7SF-XwFV6tuS63ulAQKMZCPpN–0YDQRcg93bMFMK9NbzpkSp0b0Eg
