Trending
TAFUKT
You are at:»»Lwali n wedrar (tukkist) Tamuɣli n Belɛid At Ɛli ɣer wamek tga teflest n Uqbayli di tallit-nni-ines.

Lwali n wedrar (tukkist) Tamuɣli n Belɛid At Ɛli ɣer wamek tga teflest n Uqbayli di tallit-nni-ines.

1
By on Idlisen

Lwali n wedrar (tukkist)

Tamuɣli n Belɛid At Ɛli ɣer wamek tga teflest n weqbayli di tallit-nni-ines.

Aqbayli, ma testeqsaḍ-t d asteqsi : ma tumneḍ s Rebbi ? meḥsub tuqmeḍ-as ccekk, bnu ɣef yiman-ik lxerṣum d amennuɣ ad k-yennaɣ, ad yemceččaw yid-k ma ur yezmir ara i lmut ad k-ineɣ : ɛlaxaṭer yettwasemma yettwargem, am win ara s-yebrun i tmeṭṭut-is neɣ ara t-imeḍlen d uday, ma mačči kter ! Llsas yakk amezwaru, neɣ aẓar yakk n ṭṭbiɛa, d wul, n weqbayli : d nnif. D nnif iɣef yebded, iɣef ileḥḥu, yes-s iɛac, alamma d asmi ara yemmet. D nnif i d tamusni-s, i d lefhama-s, i d leqraya-s ; i as-yemmalen iberdan, lḥaṣun, am wakken seɛɛun leǧnas nniḍen lektub ; yerna, ama di lɛerc ɣer lɛerc, ama di taddart ɣer tayeḍ, ama seg wexxam s axxam. Daɣnetta, d akken i yettamen ula s Rebbi, i t-yessen : s nnif. Imi d lǧiran-is yakk d « lmumnin », umnen s Rebbi, netta, ma ixulef-iten,… ur yesɛi ara nnif : yettwaɛzel, yettwaḥqer, yettwargem. Ulac, – di lweqt-agi iɣer d-nessaweḍ di ddunit -, ulac wi iɛebbden di ṭṭjur, d yeẓra, d yibeḥnaq neɣ deg wat sin n yiḍarren, am win yettgallan, yettwalin iberdan s iderwicen d imeslab ; lakin, ma tuddreḍ-as-d Rebbi, tcukkeḍ-t mačči d lmumen, bnu ɣef yiman-ik tregmeḍ-t !

Récité par Fahim MESSAOUDENE

Share.

About Author

Avatar

Fahim MESƐUDEN, d yiwen n umedyaz u d amyaru s tutlayt n teqbaylit, ilul ass n 07/05/1981 deg taddart n Uzaɣar Ɛwana, taɣiwant n Yiɛekkuren. Deg useggas n 1986, imawlan-is ruḥen zedɣen di taddart n Agarsafen, taɣiwant n at-yeǧǧer, id-yezgan γer tama n teẓgi n ukefadu, anda yella yezdeɣ ass-a, sebba n waya d aɣerbaz ay-s ulac deg taddart i deg-i s teɣli timiḍt. Deg useggas-nni i yekcem s aɣerbaz amezwaru n taddart-agi. Seg uɣerbaz alemmas ar tesnawit, si tesnawit ar tesdawit, yeffeɣ-d s-yinna deg useggas n 2004, s ugerdas n DEUA en électronique. Yessker-it-id umussu adelsan n taddart-is, d netta it ideggren ad iḥemmel tira, tamedyazt, d yidles sumata. Seg ujrured ar waḥrured, seg waḥrured ar tikli. Skud teddun wussan, yettidir timsal, tidyanin, allaɣ-is yesseklas-itent d isefra akken ad idirent i lebda. Si temẓi-s i yekčem γer wannar n yidles, imi kra n win i ikečmen deg-s yekkat ad-yawwi amaynut. Fahim yella d imceggaε n Radyu n Numidya deg useggas 2011, aṭas n tedwilin i yessekles i umaṭṭaf-agi. Deg useggas n 2014 yebda yettaru imagraden s teqbaylit deg waγmis « Tiɣremt » s yisem « Tansa n Talsa ». Xas akken abrid n usiẓreg ḥarcaw, netta yelḥat ḥafi, yerẓa asalu-s deg useggas n 2013 yessufeɣ-d adlis-ines amezwaru, di teẓrigin RichaELSAM, azwel-is : « Tiyersi (le nœud) », d ammud n yisefra deg-s 38 isefra. Aseggas mbaɛd, di 2014, yerna yessufeɣ-d adlis niḍen, d ammud n tullisin akked tneqqisin, azwel-ines « Timsirin n ddunit ». D adlis-is d-yeffɣen di teẓrigin n SEFRABER di tmurt n Fransa. Ugar n waya, Fahim ass-a d aselmad n tiliktrunit deg uɣarbaz n uselmed n lḥerfat n BUXALFA ( Tizi Uzzu )

Related Posts

Un commentaire

  1. Avatar
    leɛgab on

    leqbayel neɣ imaziɣen segmi tlul ddunit nutni ttamnen s Rebbi: Bab igenwan; gren irebbi i tuwdayt, i tmasiḥit, akken daɣen i gren irebbi i tneslemt.
    U yerna akken tenniḍ, ttamnen s nniyya, ulac deg-sen taḥraymit, kerhen askerkes, lexdeɛ, kerhen yakk tixidas d lefɛayel n yihwah. Dɣa, ɣef waya i ttafen iman-nsen deg wesɣan, yezga-d fell-as. Yenna-d fell-asen yiwen umusnaw umezruy: « Les berbères sont des bons religieux ».
    U yerna ma twalaḍ asɣan ɣer imaziɣen yeqqim zeddig, ur t-kciment ara tqulhatin d wayen ur nlaq, asɣan ɣur-sen fessus, mačči d aquran, amessas akken i terran wiyaḍ: ttaken tixxuṭṭert i wayen ur nemɛin ttaǧǧan ayen yezwaren.

    Reply Report comment

Leave A Reply