Srewteɣ, εebban wiyaḍ !

0

Nekk ccɣel-iw d aserwet. Sserwateɣ, ttarraɣ akin, sserwateɣ. Sserwateɣ ur ẓriɣ ayen, ẓriɣ kan beqquɣ ad srewteɣ. Ẓriɣ kan mi bɣiɣ ad srewteɣ , yewwi-d ad d-nadiɣ ayen ad srewteɣ. Ih, tɣileḍ kker kan ad d-tafeḍ ayen ad tesrewteḍ ! Ula d nekk akka i ɣilleɣ zik, dɣa asmi kkreɣ ad srewteɣ, afeɣ ziɣ ccɣel meqqer ! mačči d ayen i wumi zemreɣ, xas ma bɣiɣ. D acu ad d-yeg beqqu i win yebɣan s-nnig tezmert-is ? Ihi nniɣ-as : « Ur sserwateɣ ara ». Maεna, xas akken friɣ-tt d rray-iw ur sserwateɣ ara; mazal ttarguɣ aserwet, ttarguɣ sserwateɣ. Rnu, ay akken ssneɣ ad srewteɣ di tergit ! yuɣal almi tuqqel tergit-iw d aserwet.

Yiwwas nniɣ-as : « Imi medden akk ttazzalen ad sseḍrun targit-nsen di tilawt, ula d nekk akken ad xedmeɣ ; ad azzleɣ, ad azzleɣ, alma sseḍraɣ targit-iw di tilawt ». Dayen, friɣ-tt d rray-iw, rriɣ targit gar wallen-iw, kkreɣ-as i tudert. Medden, ttazzalen. Yal wa amek i as-yekker i tudert, yal wa d acu n tergit i d-yerra gar wallen-is. Nekk kkreɣ jemεeɣ-d tazmert, rriɣ-tt i userwet. Sserwateɣ, wiyaḍ ttεebbin. Imi ccɣel-iw d aserwet, anef ad εebbin wid iceɣlen deg uεebbi. Ma d aεebbi, ur as-ssineɣ, ur ssineɣ ad sbibbeɣ i wid yettεebbin ; maεna llan daɣen wid yesbabban. Akka i truḥ : wa yesserwat, wa yesbabba, wa yettεebbi. Yenna yinzi :Lemmer i as-yesseḥsab ufellaḥ, ur tt-izerreε ara.

Hocine Louni

Récité par Fahim MESSAOUDENE

Share.

About Author

Fahim MESƐUDEN, d yiwen n umedyaz u d amyaru s tutlayt n teqbaylit, ilul ass n 07/05/1981 deg taddart n Uzaɣar Ɛwana, taɣiwant n Yiɛekkuren. Deg useggas n 1986, imawlan-is ruḥen zedɣen di taddart n Agarsafen, taɣiwant n at-yeǧǧer, id-yezgan γer tama n teẓgi n ukefadu, anda yella yezdeɣ ass-a, sebba n waya d aɣerbaz ay-s ulac deg taddart i deg-i s teɣli timiḍt. Deg useggas-nni i yekcem s aɣerbaz amezwaru n taddart-agi. Seg uɣerbaz alemmas ar tesnawit, si tesnawit ar tesdawit, yeffeɣ-d s-yinna deg useggas n 2004, s ugerdas n DEUA en électronique. Yessker-it-id umussu adelsan n taddart-is, d netta it ideggren ad iḥemmel tira, tamedyazt, d yidles sumata. Seg ujrured ar waḥrured, seg waḥrured ar tikli. Skud teddun wussan, yettidir timsal, tidyanin, allaɣ-is yesseklas-itent d isefra akken ad idirent i lebda. Si temẓi-s i yekčem γer wannar n yidles, imi kra n win i ikečmen deg-s yekkat ad-yawwi amaynut. Fahim yella d imceggaε n Radyu n Numidya deg useggas 2011, aṭas n tedwilin i yessekles i umaṭṭaf-agi. Deg useggas n 2014 yebda yettaru imagraden s teqbaylit deg waγmis « Tiɣremt » s yisem « Tansa n Talsa ». Xas akken abrid n usiẓreg ḥarcaw, netta yelḥat ḥafi, yerẓa asalu-s deg useggas n 2013 yessufeɣ-d adlis-ines amezwaru, di teẓrigin RichaELSAM, azwel-is : « Tiyersi (le nœud) », d ammud n yisefra deg-s 38 isefra. Aseggas mbaɛd, di 2014, yerna yessufeɣ-d adlis niḍen, d ammud n tullisin akked tneqqisin, azwel-ines « Timsirin n ddunit ». D adlis-is d-yeffɣen di teẓrigin n SEFRABER di tmurt n Fransa. Ugar n waya, Fahim ass-a d aselmad n tiliktrunit deg uɣarbaz n uselmed n lḥerfat n BUXALFA ( Tizi Uzzu )

Leave A Reply