Ass n 23 wamber tameddit i d-yella usiher adelsan deg usideg n Tiddukla Numidya n Wehran i usenzi s ubuddu n sin yedlisen n Mass Ǧamal Benɛuf : Ungal, timlilit n tɣermiwin d tmezgunt, Bu tfuset.
Ǧamal Benɛuf d ameɣnas aqdim n tmaziɣt di Wehran, daɣen d amyaru s tutlayt-is, yella gar wid i d-yeslulen Tiddukla Numidya n Wehran akken daɣ i yesselmed tamaziɣt deg tiddukla-ya aṭas n yiseggasen.
Asarag neɣ timlilit d tin i yebdan s usnemmer i wid i d-yusan, ama d imeɣriyen, iɛeggalen n tiddukla d kra n yinelmaden n tesdawit. Syin akkin tella-d ddqiqa n tsusmi i yiman n umeɣras Saɛid Buxari i ɣ-yeǧǧan ass n 22 wamber kan. Umbeɛd yemmeslay-d ɣef sḍis n yedlisen i d-yessuffeɣ yakan umeskar-a ma ttwaḥesben-d sin n wass-a (Timlilit n tɣermiwin 2002, Tujjma tuzzma 2004, Di tmurt uɛekki 2007, tullisin Taklit n tayri, Ccix lkanun d Bu tfuset 2017). Uqbel ad yerr lwelha ɣer tmezgunt i ɣef i d-yewwi awal ass-a “Bu tfuset” d umeslay fell-as s telqey imi d tikti i d-yewwi seg leqdic n walman G.W.Goêthe d tneqqist-is Fauste i yettwaxedmen yakan s waṭas n tutlayin-nniḍen, d tin i wumi i yefka rruḥ n teqbaylit, ibder-d kuẓ n yiwudam yellan daxel d kra n tulmisin i yesseqdec iwakken ad yesmed tamezgunt-a. Ayen kan i ɣef nerra lwelha, d akken tamezgunt yacban tagi i wumi d-yexdem azgay (adaptation) Ǧamal Ben Ɛuf d ayen ur neshil ara, d aḍris ilan anamek lqayen, ladɣa mi as-yerna ccbaḥa i uḍris i d-yusan s talɣa n usefru d tmeɣrut. Yemmeslay-d ula ɣef wuguren i d-yettmagar umeskar s umata mi ara yebɣu ad d-yessuffeɣ kra yexdem, amzun akken ixxamen n teẓrigin xeddmen akken i asen-yehwa neɣ sserwaten kan, d amedya i d-yefka ɣef teẓrigin l’enag i igan taduli n tmezgunt-is Ccix n lkanun ara d-yeffɣen deg wussan i d-iteddun war ma cawren ameskar, d tugna ur nesɛi ara assaɣ d uḍris .
Ar taggara yella-d uskasi, imi i yefka awal i yimeɣriyen ad sen-d-yessegzu ugar tamezgunt-a.
Uqbel ad d-yili lbiɛ s ubuddu d kra n tugniwin n usmekti. Syin akkin msebḍan wid i d-yusan s lferḥ.
Khaled Achoui.
23/11/2017.
