Amezday n yinaẓuren n Cemmini heyyan-d tiẓrigt tis-snat n temzikent tagraɣlant n tewlaft « Tawlaft tamacahut » di temnaḍt n At Weɣlis seg 27 almi 30 Meɣres deg wexxam n yilemẓiyen n Farid uzadi.
Aṭas n tfelwiyin n tewlafin i d-yettwaseknen sɣur ilemẓiyen inaẓuren yefkan azal i taɣult-a n useknew, imi amraḥ n wexxam n yilemẓiyen yeččur s tewlafin yemgaraden seg unaẓur ɣer wayeḍ, yal yiwet dacu i d-senfalay s tmuɣli yemxalafen. Imsuddsen llan s wudem igerrzen, imi sreḥben s yinebgawen-nsen akked lɣaci id-yerzan si yal tama gar-asen imezdaɣ n Cemmini d tudrin i asen-d-yezzin, ad d-naf azal n tmiḍi yemttekkiyen id-yerzan seg yal tamurt n umaḍal gar-asen : Lmerruk, Fransa, Liṭali … am wakken id-llant aṭas n lwilayat n tmurt n Lezzayer.
Axxam n yilemẓiyen n Cemmini Farid uzayed yeldi-d tiwwura-s i yilemziyen-a, yefka-d afud n lemɛawna i uslal n tdukla-ya. Anemhal yenna-d : «Cemmini tesɛa aṭas yinaẓuren, d tafat n uzekka maca ur sɛin ara allalen s wacu ara ttqabalen timzikiyen ixeddmen, uḥwaǧen afud n lemɛawna, azday, timesliwt, sɣur udabu akked d yimezdaɣ iwakken ad aẓen ɣer sdat wa ad qablen timzikniyin id-iteddun s wallalen isen-ilaqen ». Gar yimsuddsen d yinaẓuren id-yellan di temzikent-a Mass Toufik Hadibi d Mass Fares Hadi nnan-d : «Taɣiwant akked kra yimzenza n temnaḍt n Cemmini fkan-d adrim s wacu iqublen timzikent, imi ilemẓiyen id-iheyyan leqdic ur ssekfan ara iman-sen s wacu ara qablen timzikent, imi lecɣal yecban wiyi ilaq-asen ttawilat ilezmen ». ɣef wakka, nwekked-d dakken adabu yestehza deg yizerfan n unaẓur sumata ad d-nini ur as-yefki ara azal i tẓuri. Deg teɣzi n temzikent inaẓuren qublen wid id-yerzan s leqdicat-nsen, yella-d udiwenni yid-sen, d usegzi ɣef wayen xedmen s telqay. Ma nuɣal-d ɣer yiswan n temzikent :
Amezwaru : fkan tagnit i wesbuɣer n taɣult n useknew, d wesnerni n tarrayin timaynutin, wa ad d-snulfun idles di tazwara d uslali-ines, wa ad fken afud i yinaẓuren ilemẓiyen deg umecwar n tenfalit d tẓuri.
Wis-sin: ad fken tagnit i medden ad walin amaḍal n tẓuri, daɣen ad xedmen assaɣ gar yinaẓuren ilemẓiyen d wegdud.
Wis kraḍ: bɣan ad ssiwesɛen timzikent ugar n waya, amedya ad xedmen timzikiyin yemxalafen s lemɛawna akked yilemẓiyen d tdukliwin-nniḍen.
Ilemẓiyen inaẓuren ttunefken-asen kra yizɣanen d yiwellihen ɣef tewlafin ixedmen sɣur inaẓuren yesɛan tarmit, d ayen yeǧǧan ilemẓiyen ferḥen aṭas s yiwenniten d usenqed, imi uɣalen sɛan tabɣest akter akken ad reqɛen leqdicat-nsen akken iwata wa ad aẓen ɣer sdat s wesnerni d usnulfu n useknew.
Deg taggara nessaram d akken ad ilin ugar n leqdicat yecban wiyi, acku amdan s tẓuri id-yessnulfay, id-yessenfalay iḥulfan-is, s yes yettidir, yessugun tirga-s d wayen yessaram. Timetti war taẓuri am wemdan mebla allaɣ.
2 commentaires
tanemmirt i ṣunya f umagrad-a
At Weɣlis di lǧiha n Weqbu (Bgayet), neɣ wissen ahat llan wiyaḍ
Igarrez unamek swayes d -tessiwded isali-agi, tennid-d sekra yellan tes3id imal deg tira n tmazight Gedha