Tigi d timucuha n wedrar n Jerjer, adrar aberkan, adrar n nnif, adrar n lḥif : akken i s-yenna win n zzman :
i yebɣan lḥerma ad tagar Yali s adrar, Yečč abelluḍ bu tcacit Wi yebɣan irden d tfanṭazit Iṣub s azaɣar Ad yeɣleb agdi d temrit ! Yura-ten ccix Ibrahim Asedqaw di ttnaṣfa n lqern rbaɛṭac, ad yessifes fell-as Rebbi di ddunit, yeɛfu fell-as di laxert ! Amin !
1-Lejmuɛ n lewḥuc
Di zzman amezwaru, nnejmaɛen lewḥuc, akken llan, myeɛhaden s Rebbi, ur myuččen, ad hennin di ddunit. Semman izem d agellid fell-asen, ( ay d agellid, ɣas Rebbi ! ), rṣan tilas d inagan.
Izem yezdeɣ di teẓgi d tameqqrant, netta d wuccen d yilef d tewtult d weɣyul d tyaziḍt d tfunast, llan d lxeddam-is, ɣef wakken d-ssawalen tamacahut. Mkul axeddim iqeṭṭu-yas ṣṣalḥa: ilef, yeggan fell-as; uccen, yeddal yes-s; tawtult, yessummet-itt; abareɣ yettagem-as-d aman, aɣyul izeddem-as-d isɣaren; tayaziḍt tettarew-yas-d timellalin; tafunast tettak-as-d ayefki.
Hennan lewḥuc: teksa taɣaṭ d wuccen! Ferḥen, ɛlaxaṭer lehna yeḍmen leɣna. Lḥaṣul, ṣeggmen ddunit lukan ur asen-tt-yessexṣer ara wuccen yerra yizem d amrayi. Uccen ur yefriḥ ara s uṣeggem-agi n ddunit: yuɣ tannumi yekkat timeɣriwin; yendem f liḥala taqdimt: mi d-yesmekti aksum azegzaw d idammen yeḥman, ad as-yuɣal d tiselbi. Ass-a ḥermen: acu ara yili wi ixedmen ? ad yeɛṣu ? Accaren n yizem qeḍɛen, leḥkem-is akken nniḍen. Ihi, yejbed-d taḥraymit, yessefra ad yessefreɣ di lxeddam n yizem s tuffra yiwen yiwen, ad yuɣal d imciṭni.
…. / …. yettkemmil
Yettwakkes-d si FDB ( Le Roman de Chacal) – Brahim ZELLAL – 1964
