Tigi d timucuha n wedrar n Jerjer, adrar aberkan, adrar n nnif, adrar n lḥif : akken i s-yenna win n zzman :
i yebɣan lḥerma ad tagar Yali s adrar, Yečč abelluḍ bu tcacit Wi yebɣan irden d tfanṭazit Iṣub s azaɣar Ad yeɣleb agdi d temrit ! Yura-ten ccix Ibrahim Asedqaw di ttnaṣfa n lqern rbaɛṭac, ad yessifes fell-as Rebbi di ddunit, yeɛfu fell-as di laxert ! Amin !
3- Uccen d tewtult
Tusa-d tefsut: tezzegzew tmurt, teǧǧuǧeg, fsant ṭṭjur, ttarwen lewḥuc. Iruḥ wuccen yewwet-as llir i tewtult yenna-yas:
- Yessetma-m ha-tent sɛannt-d arraw-nssent: ad ten-awint i tziri ad ǧellben di leḥcic, ad ččen zzeɛter neɣ asegmi ufeqqus. Kemm, qqim dagi a kem-yessumut lmir n lewḥuc !
Ur as-terri ara tewtult d aɛrab wala d aqbayli, lameɛna tger-d tinexṣaṣ: nnḍen-as lehdur n wuccen i wul-is, amcečči, qebren-tt.
Ɛeddan kra n wussan, tuɣal tuɣ awal n wuccen: truḥ s izem, tenna-yas s tergigit:
- A lmir n lewḥhuc, ad i yi-tserrḥeḍ: bɣiɣ ad ruḥeɣ: ɛyiɣ !
Yeɛreḍ yizem ad tt-id-yeṭṭef, ad tt-id-yerr s abrid: iḥawet, yessaged, ur yufi. Teɛṣa: abaden!
Yewwet-itt yerẓa-tt: yenna-yas :
- Ddem, a Ben yeɛqub ad tneṭleḍ !
Yewwi-tt wuccen, yečča-tt, yemceḥ idammen: yefreḥ, ijeɛɛel ussan yelhan qrib a d-uɣalen.
…. / …. yettkemmil
Yettwakkes-d si FDB ( Le Roman de Chacal) – Brahim ZELLAL – 1964
