Tigi d timucuha n wedrar n Jerjer, adrar aberkan, adrar n nnif, adrar n lḥif : akken i s-yenna win n zzman :
i yebɣan lḥerma ad tagar Yali s adrar, Yečč abelluḍ bu tcacit Wi yebɣan irden d tfanṭazit Iṣub s azaɣar Ad yeɣleb agdi d temrit ! Yura-ten ccix Ibrahim Asedqaw di ttnaṣfa n lqern rbaɛṭac, ad yessifes fell-as Rebbi di ddunit, yeɛfu fell-as di laxert ! Amin !
2-Lmux ubareɣ
Uccen aḥili yettken yerna lxeddam irkell kkes bareɣ, mmi-s ɛemmi-s. Abareɣ yuki d wuccen d lexraẓa-s, yebna f yiman-is. Lameɛna, ayen yebɣa Rebbi ad yeḍru : urant.
Yiwwass, yuḍen yizem aṭan afessas : yewwet-it ubeḥri. Yečča timellalin di ticcert ; armi ur d-yefki ara Rebbi tawwurt, yesnejmeɛ-d lxeddam irkell, icawer-iten. Mkull yiwen d aḥeckul i d-yerna.
Yenna-yas ubareɣ :
- Ttcekkiren idammen n wuccen: qqaren d ddwa ameqqran.
Yexẓer yizem Si Mḥemmed ….. ffɣen ddaw-as.
Ijwed-d wuccen:
- D ṣṣeḥ, a lmir n lewḥuc, lameɛna ma xelṭen di lmux ubareɣ.
Yewwet yizem abareɣ, yeɣḍel-d lmux-is, yemmut. Yejreḥ wuccen iman-is lǧerḥ ameẓyan, yesqudder-d kra idammen, xedmen ddwa i lmir n lewḥuc. Yenna-yas yizem:
- Ddem, a Ben Yeɛqub, ad tneṭleḍ !
Yewwi wucen abareɣ armi d targa, yečča-t: yenṭel kan taglimt-is d yeɣsan. Yefreḥ, yenna deg wul-is: Tura, ur yelli wugur wala aɛekker.
…. / …. yettkemmil
Yettwakkes-d si FDB ( Le Roman de Chacal) – Brahim ZELLAL – 1964