Faysbook d yiwen n uẓeṭṭa inmetti i ssexdamen wazal n sin n yimelyaren n yimdanen deg umaḍal merra.
Wid yessexdamen aẓeṭṭa-ya bḍan ɣef sin; llan wid i d-yeqqaren FB d allal yelhan, llan wid d-yeqqaren ur yelhi ara ama i tezmart n umdan, ama i uxemmem-is.
Deg wudem amezwaru, Faysbuk yelha mliḥ ama i teywalt ama i usnerni n tmussni n umdan, neɣ i usenfali d udellel.
Tamezwarut, faysbuk d yiwen n wallal n teywalt i ḥemmlen tuget n yimdanen ugar n wallalen-niḍen. Imi yesqerrib ama d imdanen, ama d timuɣliwin-nsen imi i yettuneḥsab amzun d tajmaɛt anda ttnejmaɛen akk yimdanen n umaḍal, deg-s ttaken-d timuɣliwin-nsen mebla akukru ama s yisem-nsen aḥeqqani, ama s yisem uffir. Deg-s daɣ i zemren ad myussanen, ad mmeslayen neɣ ad mwalin akken bɣun msebɛaden.
Tis snat, deg-s i yezmer yiwen ad yaf ayen akk yettqellib deg yal taɣult, imi deg FB ara yaf yiwen igrawen d yisebtar ɣef kra yellan am usewwi n yal tawsit n wuččiyen, igrawen n tussna, tafizikt, taɣuri n tutlayin, tasekla, idlisen, idelsan n yiɣerfan, win yebɣan ad yinig ar kra n tmurt yezmer ad yaf igrawen ara t-iɛawnen…
Tis kraḍt, Deg FB daɣ i yezmer yiwen ad yaf akk isallen ama d wid n temnaḍt-is neɣ n umaḍal, ayen yebɣun yeḍru yettaweḍ-d deg kra n tedqiqin kan ama deg umagrad, deg tewlaft, neɣ deg tvidyut.
Maca, akken yebɣu yesɛu udmawen yelhan, yesɛa daɣ aṭas n wudmawen n diri abeɛda ma ur yessin ara yiwen ad t-issexdem.
Si tama, S faysbuk i tzemreḍ ad temlileḍ d win tebɣiḍ s ttawil n tira, n usiwel; ama s ṣṣut neɣ s tvidyut, maca daɣ d adeg anda imdanen zemren ad akren isallen n wabɛaḍ d tiwlafin-is akken ad tent-sxedmen mgal-is.
Si tama-niḍen, FB d yiwen n ubrid yettbeddilen ama deg tnefsit n umdan ama deg yixemmimen-is, imi d-yeggar ixemmimen n yiɣerfan-niḍen yemxallafen ɣef yixemmimen-nneɣ d wansayen-nneɣ; anda ayen yellan d lɛib ɣur-neɣ, ɣer yiɣerfan-niḍen ulac fell-as, d anect-a i yessedramen azalen n tmetti-nneɣ, yeggar-d azalen n tmettiyin-niḍen.
Rnu ɣer waya, amdan yezmer ad yaf isallen n lekdeb , wa yezzuzur-iten ɣef wa alma umnen-ten yimdanen, ladɣa llan wid i ittbeddilen tiwlafin s kra n wasnasen am Fuṭucup mi ara tent-iwali yiwen ad iɣil d tidet. ɣef waya ara naf ddeqs i yessexdamen FB akken ad sekren ccwal gar yimdanen abeɛda wid yemxallafen deg tmuɣliwin d yixemmimen.
Ihi di taggara, ad d-nini Faysbuk d yiwen wallal igerrzen mliḥ ama i usnerni n tmussni n umdan neɣ i uwelleh-is akken daɣ i yezmer ad yeẓḍ assaɣen gar-as d yimdanen ibeɛden. D acu kan amdan ilaq ad yissin ad t-issexdem, ad iḥader iman-is ad yernu lweqt-is anda i ilaq ad as-ixdem kan ciṭ n wakud.
Tafrara AT WEJQUQ
