« LA LÉGENDE DU COLIBRI » (s teqbaylit)
Yiwen wass, tendeḥ tmes annect ila-tt di teẓgi. Kra yellan d aɣersiw yeṭṭef-it uberriḍ, ugaden yakk nnger. Seg wakken qquren si tugdi, smeglizen kan s wallen, smuqulen di twaɣit i la iḍerrun, tellin deg iqemmac-nsen amzun ur zmiren i kra. Ḥala yiwen wefrux neɣ ayṭiṭ amecṭiṭuḥ (ad as-nsemmi abusbis) i yečča wul-is. Iga-d tabɣest.
Yebda yettawi yettarra ger uḥeǧǧaǧu i la yesrebruben ger isekla akk d yiwet temduct i tuɣ tfi. Mi d-yugem kra n tmiqqwa n waman deg uqabub-is, ad yazzel a tent-yesmir ɣef tmes-nni.
Iɣersiwen nniḍen, yiwen deg-sen mačči yemḥaḥed-d, mačči yuli-t-id wawal. Ata wefrux ujaɣiɣ la irekkem, yuli-t-id lɣeṭṭ, yenna-yas i ubusbis: » I tura kečč a bu tecyaxt, tselbeḍ neɣ d acu i k-yuɣen akka a winnat?! I tesrekdeḍ tarraṭṭa-k am kečč am wiyaḍ! Tεuddeḍ tzemreḍ ad tessexsiḍ times yecban tihin s kra n tmiqqwa n waman? »
Yerra-yas ubusbis: « Ẓriɣ mačči d ayen umi zemreɣ a t-ssexsiɣ, meεna ur uksaneɣ ara, la xeddmeɣ kan ayen i yi-d-tewwi a t-xedmeɣ. »
Ihi a wi-yufan ad nettemεanadet xerṣum cwiṭ ɣer wayen yelhan! 🙂
« Win yebɣan ad tbeddel, ibeddel iman-is. »
Tamacahut-agi (conte amérindien) yerra-tt-id ɣer teqbaylit Racid n Tiɣilt 11/15.
récité par Fahim MESSAOUDENE
4 commentaires
tanemmirt ɣef umagrad-a, d awal lqayen nezzeh. D tidet, tasarut i ubeddel n tmetti, melmi i yebdel yal amdan ayen yellan deg wul-is.
Ula d Rebbi deg weqran yefka-t-id d alugen neɣ d asaḍuf imetti: « Ur ibeddel Rebbi liḥala n kra n wedrum alamma bedlen ayen yellan deg wulawen-nsen ».
Abusbus (akken qqaren deg waẓi n at Ɛebbas), yumen s wannect-a, yeḥṣa, belli ur yezmir weḥd-s a yessens times, dacu yesteqsa iman-is: « Dacu ara xedmeɣ mgal times ». Yufa tifrat, yenna-yas: « Ad xedmeɣ is fell-i ».
Yal amdan weqbel ara yini i medden yyawt, yessefk ad yezwir deg yiman-is, ad yexdem is fell-as. tigawt-nni ara yexdem, s timad-is, d tinnubga, d asuter war ameslay, i wiyiḍ akken yal yiwen ad yexdem is fell-is.
Nehwaǧ s tuget, iwellihen yecban wigi. d iwellihen-a i yettbeddilen taflest (la croyance) n wemdan, lɛeqliya-ines. Melmi i yettamen wemdan s kra n wansay (principe) yettishil fell-as ad yebdel tigawin-ines di tudert-is n yal ass.
teɛǧeb-iyi temɛayt-agi n ubusbus, d tamsirt n ddunit, akka daɣen i tḍerru d win yettruẓun asalu, di tazwara yettaf-d iman-is weḥd-s, ulac i yumnen s wayen ixeddem, alamma ẓran meddem lewqam deg wayen ixeddem ara ad bdun ttamnen yes-s.
Tanemmirt a Fahim, terniḍ-as i ujeǧǧig ccbaḥa n weḍris, terniḍ-as taɣuri, d ayen i s-yerna une autre dimension, teεǧeb-iyi mliḥ tarrayt-agi n tɣuri n yeḍrisen i txeddmeḍ afud ugerrzen.
Ilaq akka, wa ad yaru wa ad d-yeɣɣer aḍris, akken taqbaylit ad iǧhid ugar