D nekkni igan akka, d agdud n lmeḥna ;
Ama da, am da;
Ama da, d aberrani
I yenna Zdak Mulud.
Meɣres 2001, ṭṭfen-aɣ iǧadarmiyen zdat uẓekka n Ssi Muḥend u Mḥend, nefka-yasen lekwaɣeḍ-nneɣ d-ssutren. Ssyen, yenna-yi-d yiwen seg-sen s taɛrabt : Tluleḍ di Bgayet, tzedɣeḍ deg Wehran, d acu i k-id-yewwin ɣer da?!
Yulyu 1993, di Dzayer tamaneɣt, ṭṭfen-aɣ yemsulta, nefka-yasen lekwaɣeḍ-nneɣ d-ssutren. Yenna-yi-d yiwen seg-sen : Tluleḍ deg Bgayet, tzedɣeḍ deg Wehran, d acu k-id-yewwin ɣer da?!
Duǧamber 1983, deg Wehran, ṭṭfen-aɣ iǧadarmiyen, nefka-yasen lekwaɣeḍ d-ssutren, ssyen nudan-aɣ deg wezniq zdat yemdanen, wwin-aɣ di tkeṛṛust alammi d udus-nsen. Ssyen iluɛa-yi-d yiwen seg-sen : Tluleḍ deg Bgayet, d acu i d-yewwin Rebbi-inek ɣer Wehran?!
Deg yebrir 2007, ṭṭfen-aɣ yemsulta deg webrid n Weqbu, nefka-yasen lekwaɣeḍ d-ssutren, dɣa iluɛa-yaɣ-d yiwen seg-sen : Tzedɣem deg Wehran, d acu ken-id-yewwin ɣer da?!
« Sanda tebɣam ad nruḥ »?!!
2 commentaires
win i wumi yeɛreq ṣṣwab d tidet, win ur nessin lewqam amek tebɣiḍ a t-tafen medden ɣur-s.
Tura tebdel cwiṭ teswiɛt ɣas ulamma mazal tuccar d tmeḥqranit-agi, acku tban-d tidet i medden. dacu kan ɣer daxel ur tt-qbilen ara, tusa-yasen-d tamaẓayt, d tamerzagut, qerriḥet.
Amedya, anda xeddmeɣ, ɣas teqreṣ lḥala, ur ggaren ara tamawt i kra yellan, m’ara walin aqbayli yexdem kra ini kkren yakk s yiwen wawal mgal-is. xdem ay txedmeḍ, a k-d-sukksen agram n lixsas ini sseɣlin-d igenni ɣef tmurt.
Azul,
D tidet ay d-tenniḍ, a gma-tneɣ Leɛgab. Neqqar s teqbaylit: « mekruh memmu, i wudem n mmu » (yettwaksan wegrud, ilmend n yemma-s)!! D tiyersi meqqren, yernu tezga deg inuffuten (leɛqul) n medden acku d ayen yettwaẓẓan deg wacḥal iwinsen (leqrun)-ya! Ɣas ma d tamsalt n wakud, maca, yessefk ad nall (nɛiwen) akud-a akken a d-yezreb di tikli-ines.
Ahat timsalin-a a sent-id-nuɣal s talqayt kra n wass akken a tent-neskasi…
Aṭas n yemdanen ur neḥṣi d akken tamaziɣt d tutlayt n talsa, mačči kan imaziɣen! Kra imedyaten kan:
1) imeddukal yekkren mgal inaẓiyen di ṭṭrad umaḍal wis-sin ssqedcen tamaziɣt deg ttawilat n taywalt.
2) Asmi kecmen Inaẓiyen ɣer Lpari deg ṭṭrad umaḍal wis-sin uran tiɣri s teqbaylit akken a d-sellken arrac n wudayen iwakken ur ten-ttaṭṭafen ara inaẓiyen. Tabrat-a ufan-tt deg lekwaɣeḍ yettwaffren di tmezgida (lǧameɛ) tameqqrant n Lpari.
Acḥhal imusnawen i d-tefka tɣerma tamaziɣt, ɣas mačči d yiwen a t-id-nebder: Seg Ibenxaldun, ar ibenrucd, ar ibenafernas, ar ibenbaṭuṭa; Karakala agellid igulwaten. Ababat Ugistan, Ababat Siperyan, Ababat Dduna…
Tanemmirt