Izem bu tissas

Sɣur Yedris N AT WESƐID

D tafelwit-a unaẓur Kamal Buɛrab i yefren bab-is ad tili d taduli i wammud akk d usidi*-ines d-yellan s yezwel Izem bu tissas“

Izem bu tissas

-Ammud isefra –

TAZWART

“Izem bu tissas” d ammud isefra amenzu n Yedris n AT WESƐID, nessaram a d-yernu ɣur-s wiyaḍ akken ur yettili d aneggaru. Bab n wammud-a nessen-it yakan d ameɣnas deg wannar n tsertit, yernu di tegnatin-nni n ẓẓmek, tidak iseggasen-nni n 90. Maca, am yal aqbayli, am yal amaziɣ n yal tagnit, tegguni-t truẓi usalu n tebriṭ yezzin yennḍen, terna tergel! Imi yal aqbayli neɣ yal amaziɣ yezga d amenzu di tegnatin n ẓẓmek, maca, yal mi ara s-d-yaweḍ ẓẓmek ar ugensu (daxel) n yiman-is netta, anagar idles-ines i yettaf, anagar kan ayla-s i s-d-yettarran awal, yeqqar-as-d: Aql-i da!
Kra n win yettnadin yettaf. N AT WESƐID yufa-d amrig (leslaḥ)-is, d awal. Ttawil-ines, d isefra. Ixṣimen-is d icenga-s ur yugad seg-sen, yekker ɣur-sen s ifassen-is d ilmawen, yewwet-iten s wayen yellan d aḥerfi maḍi. Yennuɣ-iten s wawal, ɣas awal-is qerriḥ nezzeh; yewwet-iten s tikta, ɣas tikta-s lqayit, qqazent rennunt!…
S wawal afessas d talɣa taḥerfit, am winna akken i sent-yeddan kan s ddac, ddac, almi d-yufa iman-is deg webrid n yiwen umedyaz ameqqran i wumi nessawal “Ssi Muḥend U MḤEND”. Ɣas ma d tallit nniḍen, d inezgumen nniḍen, d uguren nniḍen, maca, d tilufa n yimiren i d-yettalsen talalit. Abeddel yella-d kan deg wudem neɣ di teclemt-nni n sufella.
Awer iliɣ kan zegleɣ deg wawal-iw!

Awal yellan d afessas
Dlent-t tuɣmas
Yessumet ixef n yiles
Mi d-isuḍ waḍu n tissas
Iga-yas tisuqqas
Yessaki-t-id seg yiḍes
Yerma isuɣ-d yuɣwas
Allaɣ yesla-yas
Bab n wul yedda yid-s
Yeggull ad yeẓẓeɛ qawsas
U a s-yegzem tara-s
I ẓẓur yeftin di leǧnas

Afud anezmar i Yedris n AT WESƐID d widak yakk i tt-icerwen merriɣet ɣef yidra-nneɣ!..

Asidi yeffeɣ-d s yezwel « Jjwaj n yeɣyal » ɣur tezrigin « Aqbou production ».
Atnad izewlan isefra d-yeddan deg-s :
1- Tibexsisin ; 2 -Tameɣbunt ; 3- Iɣerdayen ; 4 -Taɛrict-iw ; 5- Si Muḥend u Mḥend ; 6 -Tameṭṭut-iw ; 7- Aɛdaw-iw ; 8 -Aɛeqqa yessawalen ; 9- Tala n tudert ; 10 -Taqṣiṭ n lḥubb-iw ; 11- Taqcict m isennanen : 12 -Tiqcicin n yir zzman ; 13 -Yir ddunit ; 14 -Jjwaj n yeɣyal ; 15- Rruḥ ; 16 -Tameɣra.