Yella mmi-s uɣerda d mmi-s n wemcic d imejṭaḥ, ur sɛin ara taḥraymit, ula d taɛdawt-nni yellan ger ibabaten-nsen nutni ur tt-sɛin ara. Tturaren lwaḥid, tetten lwaḥid, ttḥewwisen lwaḥid.
Aɣbel ur yelli gar-asen. Yiwen wass, baba-s n wemcic-nni amejṭuḥ 
yufa-d mmi-s yetturar d uɣerda-nni amejṭuḥ, yejbed-d mmi-s si tmeẓẓuɣt, yessekcem-it s axxam yebda yettweṣṣi deg-s:
- Amek tetturareḍ kečč d uɣerda, yerna ur as-texdimeḍ acemma?
- Nella netturar kan, nekk yid-s d imeddukal.
- Ulac imeddukal, yak widak d iɛdawen-nneɣ, atan azekka mi t-twalaḍ ini-yas rwaḥ ad nurar, mi d-yusa ečč-it. Tfehmeḍ, neɣ ala ?
- Yerbeḥ a baba, yerbeḥ
Aɣerda-nni amejṭuḥ, tameddit mi d-yekcem s axxam yenna-yas baba-s:
- Anda teqqimeḍ ar tura?
- Lliɣ tturareɣ d wemcic amejṭuḥ, mmi-s n lǧar-agi-nneɣ.
- Amek ? Telliḍ tetturareḍ yid-s ? Yak widak d iɛdawen-nneɣ, ur t-tugadeḍ ara a k-yečč. Ḥader, ad tuɣaleḍ ad turareḍ yid-s, anda t-twalaḍ rwel, neɣ ffer tfehmeḍ.
- Yerbeḥ a baba, yerbeḥ.
Azekka-yinna, amcic yekker-d zik, yebda yetturar weḥd-s,
si leɛḍil ar d-yas uɣerda amejṭuḥ, cwiṭ kan atah iḍal-d si ger lelwaḥ n tewwurt.
Yessawel-as wemcic amejṭuḥ:
- Rwaḥ ad nurar?
Yerra-yas-d uɣerda:
- Ula d nekk iweṣṣa-yi baba leɛca.
