Yebda useggas amaynut deg iɣerbazen, igerdan uɣalen ɣer tlemda, wa yefreḥ, wa yennuɣna. Wa yewwi aqrab amaynut yeččur d tizmamin akked wayen akk i as-d-yenna uselmad-ines, wayeḍ yewwi aqrab-is d ilem, winna yessager gma-s aseggas-nni yezrin, baba-s yewwi-yas-d s berru tizmamin d wayen akk i ad yessuter uselmad-is, di leɛḍil ar d-tekcem tzayezt ( salaire ) n waggur-nni. Ababat yencew, yerna-yas nnefda i tɣeggaḍt-is akken ad yessefreḥ arraw-is.
Mazal d-igir nnehta ubabat, hattaya lɛid tameqqrant tessaweḍ-d ! tazayezt mazal ur tekcim ara, ameṣruf yeqwa, ilaq wihin, ilaq waya… Daɣen axeddam yemmekta-d akken ilaq-as ad d-yaɣ ikerri neɣ aqelwac akken ad iɛegged am netta am medden merra. Di leswaq tecɛel tmes, akraren ulin di ssuma, ɣlay-it mačči dayen i wumi yezmer uxeddam meskin. Yettxemmim amek ara yexdem, ma ad yezlu am netta am medden, neɣ ad yexdem kan rray-is ɣef leḥsab n texriḍt-is.
Yemmekta-d arraw-is, ilaq daɣen ad asen-d-yaɣ iselsa ( vêtements ) akken ad cebbḥen am nutni am tizzyiwin-nsen, maca idrimen ulac. Akken yexdem yeɛweq, ma yekcem s axxam ifassen-ines d ilmawen, yugad tameṭṭut-is, ma yerna yerḍel-d daɣen idrimen bezzaf fell-as. Ileḥḥu yeshetrif : « aggur-agi daɣen ad yaweḍ lexlas n trisiti akked d waman… »
Qqaren at zik : « zzreɛ ara tessusiḍ, arew ara trebbiḍ », kra n yemdanen ass-a ččuren-d lqaɛa d dderya, alarmi ɛewqen ansi ara akken i ddunit, ansi i as-kkan d takeddart, taggara ad ttrun, lukan zriɛen kan ayen ara ssusin, tili ad asen-d-tas ddunit fessuset fell-asen…
Kra n yemdanen ass-a ssnen ad magren ddunit, zerrɛen kan ayen i wumi zemren ad ssusin. Seɛɛun-d kan ayen iwumi zemren ad rebbin. Xas ma ḥercawet teswiɛt ad ten-tafeḍ ttidiren akken bɣan, sɛeddayen ussan yelhan, ttfarasen ddunit akken bɣan. Sɛan imuras, ččan, swan, lsan, zhan, ḍsan, rebban arraw-nsen, sseɣren-ten.
Fahim MESSAOUDENE
Un commentaire
Neqqar-d s teqbaylit:
– yal wa ad yeddu ilmend n tgecrirt-is,
– ulac di ddunit wi tt-yufan akken yebɣa
Ihi, icuba-yi Rebbi, di temsalt n sɛaya d cci, ur ilaq ara a nwali ɣer wiyaḍ, win ireẓnen yesɛan leɛqel yettɛanad wiyad di tmusni, di ttrebga… acku d wigi i ras lmal uma tuččit, llebsa, … annect-a yakk yettas-d yettruḥu.
tura win iɛeggden, s tezmert-is, ma d win ur nezmir ur ilaq ara ad iɛaned acku a tt-id-yawi deg iman-is, ad iruḥ a d-yerḍel idrimen a d-yawi ikerri, a ten-id-yekkes imiren seg umeṣruf n at wexxam, annecta d urliaq, Rebbi ur d-yenni ara akka u yerna d ayen ur nqebbel leɛqel.
Nuɣal nekkni s yezzayriyen, nettɛanad menwala, daɣnetta: qqaren-as deg wawal: « Xdem am lǧar-ik neɣ bdel tawwurt n wexxam-k » d tisselbi, ulac tisselbi yernan nnig ta.