Lwennas Matub, Ssaɛid Ẓamuc, d kra imeddukal imenza n Numidya.
Tawlaft (tteṣwira)-ya tettwaṭṭef-d di Belɛebbas, aseggas 1985.
ANDA-TT TEƐZIBT
Yak nnan telha nniya
D lḥila n ṣṣfa
Bab-is xas yeɣli ad yekker
Tettak udem i taggara
Tettrebbi lqima
Wi tt-yesɛan ur inegger
Nekk ay atma ur iyi-tehwa ara
Armi i d-nemsegra
I d-yendeh s yisem-iw liser
Anda-tt teɛzibt ut nerdiḥ
Neɣ asebsi ur nendiḥ
S Lḥesnawi d Lɛenqa
Sselseɣ-as i lɣerḍ jjiḥ
Ass-a a d-tettiqsiḥ
Tedwilt-nni ur rğiɣ ara
Yak nnan leɛmer yerbiḥ
Bnadem ur neqbiḥ
D lweqt ar niqbiḥ tura
Ɣer tiḥerci ad ncerreg ttesriḥ
A sen-neḍlu amsiḥ
I wid yesburren nniya
S rrba i d iyi-ssrebḥen
D idim yemmaren
D aneɛyabu ttwargameɣ
Ṣeddden lerbug akk celxen
Ula yi-d-yeṭṭfen
Deg weḍref n wegni n yiseɣ
Allen zik yettneḥcamen
Ur ttadrent dayen
Xas ma zdat wi ttqadareɣ
Tagmat a s-rẓeɣ ifadden
A s-gerrzeɣ lekfen
Deg uzabuq ad as-serrḥeɣ
Ṣṣifa n leḥbab a tt-beddleɣ
S tiḥerci a tt-jeggreɣ
S tumlilt n tmenqas-iw
Bu ttrika ɣer-s ad senndeɣ
Ma d wayeḍ a t-ḥeqreɣ
Xas yefruri-d seg uẓar-iw
Ɣur Rebbi afus a t-id-kkseɣ
Aḥezzeb a t-nefḍeɣ
A t-nfuɣ seg idisan-iw
At ẓẓur a ten-id-necdeɣ
S yes-sen ad nefḍeɣ
Widen ur icekkeb lɣerḍ-iw
D usfih i isburren rrxa
Yeḍsan ɣef lḥerma
I iferrun tilla ass-agi
D ungif yeččan deg uɣenǧa
Ɣur d-tegwra tɣawsa
F iderman ad yettrayi
Taddart ma tḥemmel zzayla
Ttekki g imezwura
I s-d-yettḥuccun mebla acetki
Ma tessaɛteb-ik tmara
Zuff beddel tama
Tettuḍ amek iga iḍelli
Taddart ma tḥemmel ccta ccta
Ttekki g imezwura
I s-d-yettḥuccun mebla acetki
Ma tessaɛteb-ik tmara
Zuff beddel tama
Tettuḍ amek iga iḍelli
Taddart ma tḥemmel zzayla
Ttekki g imezwura
I s-d-yettḥuccun mebla acetki
Ma tessaɛteb-ik tmara
Zuff beddel tama
Tettuḍ amek iga iḍelli
Lwennas Matub (Lounès Matoub).
5 commentaires
Azul fell-awen!…
Atan dɣa, yecbeḥ wesmel-a s tlaba-ya i s-tesselsem; yeqqel d isli! Tanemmirt i inedbalen ɣef wussisen (lmeǧhud)-a i tgen!
Ɣur-i kan yiwet tamawt ɣef tira n tezlit-a, attan ɣur-wen: isem-is « Matub », mačči « Meɛtub?! Netta s timmad-is yenna-t-id deg yiwet tezgilt n rradyu asmi s-d-yessawel yiwen wemseflid, yerra-yas akka: nekk, isem-iw « Matub », mačči Meɛtub! Yernu turam-d « Matub » snat tikkal, maca, sufella tura-d Meɛtub!
Tizlit-a ḥemmleɣ-tt nezzeh.
Tanemmirt
Azul,
Tanemmirt ay ameddakel « Bu ccfaya » ilmend n tamawt-agi d-tegreḍ.
D azgal kan i nezgel, wamag neḥṣa swaya, skud nura-t snat tikkal s yisem-is akken yewqem!
Yelha usuref!
Di talwit.
Akken qqaren s teqbayli: – walant wallen, yeččur yimi »!
Akka ay d LWENNAS, anda yerra yufrar. Llan wid yettutlayen ɣef timmuɣnest d umennuɣ-ines ɣef temsal tuɣdimin, amzun akken swaya kan swayes yufrar di ccna!.. Ɣur-i nekk, kra ur t-yezgil: Isefra-ines ufafen, ufraren; aẓawan-ines lqay ɣur-s iman; ma d taɣect-ines tettḥaz kra n wi yesɛan tameẓẓuɣt d wul. Nezmer a d-nini fell-as yerna war akukru: d AƔERBAZ di tẓuri d udayaz amaziɣ!
« Bu ttrika ɣer-s ad senndeɣ
Ma d wayeḍ a t-ḥeqreɣ
Xas yefruri-d seg uẓar-iw »
Yal ajeǧǧig s lqima-s. I widak-nni i yettɣennin akken » ah ala la, d amebruk lɛers »; ɛni mačči d aɣerbaz?!
« Imi lqum yugi irgazen
akka ara ɣ-ttdeqqimen
azgalu ur ɣ-itekkes ara ».
Matub
Tanemmirt