Anwa yessaɣayen timest ?

Kra ara tekk tsemhuyt n unebdu, agama tefsex tugna-s, yezga yeḥzen. Ẓẓayit wussan, ɣezzifit d imurar. Imdanen yerẓa wezɣal, ad ten-tafeḍ zzuɣuren iḍarren-nsen di lqaɛa, tidi tettcercur ɣef tfekka-nsen, ṭṭafaren tili tili anda ma tt-walan ad qqimen din. Imuḍan aṭṭan si tama, azɣal si tama nniḍen,
s lḥir i ttraǧun ad d-taweḍ tmeddit, ad yerreẓ lḥal, ad d-yeglu s ciṭuḥ n talwit, talwit n tasmuḍi d-yettarran tarwiḥt. Yal ass imdanen mi ara d-kkren yettmagar-iten-id ujeɣjaɣ n lḥamu. Akken kan ara d-yenqer yiṭij si tiɣilt, nnda n tanzayt ad tt-yesskef lḥamu-s, asigna ad yerwel ad yeǧǧ igenni. Akken ula d imdanen ad ten-tafeḍ regglen i tafukt yesṭenṭunen aqerruy-nsen. Anaɣur yesseknef tamurt, tesskew yal d imɣi, yesskef timedwa yal tamda tuɣal d amdun. Abbu yettak anzi ar wagu n tegrest mi ideflawen, nettwali-t yettali-d si yal tiɣilt. Abeḥri aḥmayan d-yettasen tanila n wabbu-nni, yeskaway afriwen n tzemrin, yessekmac iɛeqqayen-is seg ucayaḍ n fad, ageffur yeččeḥ, yugi ad d-yeɣli dayen. Amekraz yeẓẓan taleqqamt akked win ileqmen aẓebbuj, uysen ad d-ssekren tazemmurt, wid-nni i tent-yesɛan deg yiger rfan, akken i asent-xedmen ur mniɛent ara, yal aseggas reqqent, aseggas wayeḍ mi d-gren ixulaf, ad zellfent daɣen s ijujaḥ n tmest. Ijujaḥ n tmest ttemɣen ɣef yisekla, war ceḥḥa, win ṭṭfen ad t-rren d iɣiɣden. Ijujaḥ n tmest ɛewwlen ad awḍen s igenni, ulac imɣi neɣ aseklu zegglen yeḥǧuǧa-s. Timest ur tettɣanfi ara, ayen d-temmuger sdat-s ad t-tečč, ala iblaḍen akked iɣulad ara d-yettbanen ansi tɛedda, ma d isekla yerɣan ad bedden am iɛekzan, ad sburren ambuxen. Aḍu, amdakel n tmest yettawi-tt anda ma yebɣa, tikwal yettawi-tt ar gar yixxamen. Aman acengu n tmest ulac-iten, acḥal n wagguren-aya ur d-tenɣil tiqqit, ayen akken yejmeɛ wakal, yesskef-it yiṭij. Imdanen ur ten-ufan ara, cctaqen ad ten-walin. Ččḥent tliwa, qquren icercuren. Timest ulac tama tezgel, yal ass reqqent tzegwa, d igeṭṭaren kan akken i ireqqen. Abbu yettali-d deffir n yal d adrar, deffir n yal tizi, tiferzezza ɣellint-d am umeččim yal ass. Agama yezga yettru, isekla ttcektin ttrun, tiẓegwa ssewḥacent s tebrek i lsant, ulac win ara tent-imenɛen. Agama n tmurt-nneɣ zegzawen yuɣal d aberkan berriken, yuli-t leḥzen.

Fahim MESSAOUDENE