Taqṣiṭ n Sidna Musa

Taqṣit n Sidna Musa.
mi d-yuɣ abrid s uṣelli.
Yufa-ten-id qqazen aẓekka
D acu txeddmem a wigi ?
Yenna-yas ad ɣizeɣ
Xerṣum d lewjur saḥen-i.
Mi iɛedda Musa yeqqaz.
Mi s-gren leblaḍ yuli.
Nnan-as ah a Musa.
Nettu lqis ur t-id-newwi.
Wagi yemmuten.
Amzun akk d keččini.
Mi iɛedda Musa ad iqis.
Yeɛdel teɣzi tehri.
Taxeddaɛt ay atma diri-tt.
Ad nruḥ ad nwadeɛ lwali.
Mi yetqebbel ɣer yemma-s.
D acu k-iceɣben a memmi ?
Ma d ay d ṭṭlaba.
Lfani d-rebbaɣ i wumi
Yenna-yas d ṭṭlaba Rebbi.
I d-yerzan ɣur-i.
Tenna-yas ah a Musa.
Ili-k d argaz n ɛali.
Yak ṣṣaḥaba mmuten.
Ar kečč d nekkini.
Mi d-iqebbel ɣer zzwaǧ-is
D acu k-iceɣben a xeḍri ?
Ma d ay d ṭṭlaba
Ssdaq-iw zzenz-it mumi.
Yenna-yas mačči d ṭṭlaba.
D Rebbi i d-yuznen ɣur-i.
Tenna-yas gedha s Musa.
Ili-k d argaz n lɛali.
Yak ṣṣaḥaba mmuten
Ar kečč d nekkini.
Ah ya memmi d agujil nebla lwali.
Yenna-yas, ah a yemma.
Baba atah da ɣur-i.
Ah ya memmi d lexyal.
D lexyal i d-ibanen akkenni.
Lmelk mi t-id-isuma.
S aḍar n lǧid a t-yencer.
Yenna-yas beɛd ssyenni.
Ma din i d-tbeddeḍ ṭixer.
Musa d argaz lɛali.
D lkaɛba i wumi d-idewwer.
Lmelk mi t-id-isuma
s aɛebbuḍ n lǧid a t-yencer.
Yenna-yas beɛd ssyinni.
Ma din i d-tbeddeḍ ṭixer.
Musa d argaz lɛali.
Yallass yezga d aṣebbar.

Lmelk mi t-id- isuma
s afus n lǧid a t-yencer.
Yenna-yas beɛd ssyinni.
Ma din i d-tbeddeḍ ṭixer.
Musa d argaz lɛali.
D leqlam yezga ineǧǧer.
Lmelk mi t-id-isuma
s aqemmuc n lǧid a t-yencer.
Yenna-yas beɛd ssyinni.
Ma din i d-tbeddeḍ ṭixer.
Musa d argaz lɛali.
D leṣlah ideg ihedder.

Lmelk mi t-id-isuma
ɣer tiṭ n lǧid a t-yencer.
Yenna-yas beɛd ssyinni.
Ma din i d-tbeddeḍ ṭixer.
Musa d argaz lɛali
I yeẓra di leɛyub yeṣṣer.
Yenna-yas gedha s Musa
Ansi s d-nebda yeẓwer.
Ma yerɣeb ad as-nernu cwiṭ di leɛmer.
Yenna-yasen ala.
Ruḥen ɣer lǧennet wwin-as-d tatteffaḥt.
Tazeggaɣt ḥal leḥmer.
Fkan-as-tt i Musa yesraḥ-itt.
Mi yeɛḍes yedda leɛmer.

Taqṣiṭ n Sidna Musa si tgemmi ttawin-tt-id lexwan di ddker akken i tt-id-nelqeḍ sɣur Nna Seɛdiya Ɛacuri.