I tikkelt tamezwarut deg umezruy n lezzayer, axxam n weɣmis n Al-Ĝamhuriya, ass-a d netta i yeldin tiwwura-ines a d-tili temlilit ɣef usegmek s tmaziɣt.
Timlilit-agi tella-d seddaw leɛnaya n useqqamu unnig n timmuzɣa d tiddukla Iqra d tilin n mass lwali n twilayt n Wehran.
Lwali yettunnefk-as wawal s yisem-is d imḍebber amezwaru n twilayt n Wehran, i d-ibeggnen lferḥ-ines, imi tettwaxtar temdint n wehran akken a d-yili deg-s usenfar yecban wagi « aselmed n tmaziɣt » am wakken daɣen i d-yewwi awal ɣef tumast n Lezzayer ibedden ɣef kraḍ n terkizin : tineslemt, taɛrabt d tmaziɣt. Ma yella d mass Lhacmi Ɛeṣṣad, yewwi-d awal-ines ɣef tirmit n useqqamu unnig n timmuzɣa deg uselmed n tmaziɣt, yewwi-d awal s talqayt ɣef usenfar usegmek s tmaziɣt, am wakken i d-yewwi yid-s kra ifuras s wayes ara d-yili uselmed n tmaziɣt.
Massa Mbarki Ɛica, taselwayt n tiddukla Iqra, nettat tger irebbi si tazwara i usenfar yecban wagi : tamaziɣt d ayla-nneɣ, ilaq d nekni ara yilin d imḥaddan fell-as. Aselway n tiddukla Numidya mass Ssaɛd Ẓamuc, ula d netta yerra tajmilt i wid yellan deffir leqdic-agi, imi d wagi i d iswi n tiddukla Numidya. Ssyen tella-d temsirt tamezwarut n tmaziɣt i d-ihegga Mass Bessay Hewwari d aɛeggal n tiddukla Numidya, d tamsirt n tẓunẓut. Tura yeqqim-d kan ɣer imaziɣen i d-yeqqaren « tamaziɣt di lakul », attan di lakul, tura ilaq-asen ad ruḥen ɣer lakul akken ad ɣren.
2 commentaires
Tanemmirt a Yucef f isali agi yessefrahen. Tiwwura ldint-d akken d-tennid, tegra-d sghur-negh s nekni i iqedcen, d acu i ilaq ad d-nefk? amek ara nili gher tama n tigawt-a? amek ara nfares tagnit-agi akken tamazight a d-teffegh si tuqqna tuffra ladgha di Wehran? cukkegh d ayen umi nezmer, u d aya f waydeg nekkat ad t-nexdem.
lyazid
Tamaziɣt di lakul itella di Wehran. ilaq tura a nessebɣes wigi i yeqqaren akka, u a sen-nmel tafat ɣer zdat. Ilaq win yeqqaren tamaziɣt ad izer acimi i tt-yeqqar, d acu ara yexdem yis-s.
Tazwara, ɣef usebɣes, ilaq wigi yeqqaren, amedya a sen-nexdem arraz, n win ara d-yarun, asenfar s tmaziɣt (tinawt, tamacahut, …); ma yella ɣef tafat: ilaq a sen-nesken iberdan, taɣulin, lecɣal i yeḥwaǧen tamaziɣt a ten-nwelleh ɣur-sen, i wakken ad sqedcen ayen i d-lemden; ayagi d ayen yesɛan tixxuṭṭert tameqqrant.