Rreḥba tagraɣlant tis-ɛecrin n wedlis SILA– Lezzayer – 2015

Tendeh rreḥba tagraɣlant tis ɛecrin n wedlis SILA, di teɣremt n temsikniyin SAFEX –Lezzayer i idumen si 29 Tuber ar 07 Wember 2015, anda i tettiki tiddukla Numidya n wehran i tikkelt tis-snat, tagnit-agi i s-yettunefken s lmendad n useqqamu unnig n timmuzɣa HCA, ara nesnemmer aṭas, aṭas.
Ayen ara d-ixeḍfen allen mi ara ad tkecmen ar rreḥba yagi i tikkelt tamezwarut, d tisri n rreḥba-yagi s tmaziɣt « Ɛecrin iseggasen nekkni neṭṭef tasga » s isekkilen n Tifinaɣ, d ayen igerrzen.
Rreḥba-yagi tagraɣlant d tamezwarut deg yill agrakal, imi d-tegla aseggas-agi s wugar n umelyun d izwel di yal taɣulin ama d tussna, d asɣan, tasekla, adlis n warrac,…. i d-wwin yexxamen n tezrigin si 50 tmura n ddunit i yettikin, ugar ɣef tezrigin d tsudutin tunṣibin n tmurt-nneɣ.
Si tama nniḍen, mi ara ad ttezziḍ ger tɣemmar n tezrigin d yedlisen n Rreḥba-yagi, ad tḥusseḍ akken amkan n wedlis amaziɣ, ger yedlisen nniḍen, ɣas s wazal-is, ɣas akken aṭas n taɣulin ideg i d-iban, maca, yezmer ur d-yettwabdar, ma nwala amḍan, talɣa neɣ isental, n yedlisen di tutlayin nniḍen, ….. mazal aṭas n leqdic.
Tiɣmert n useqqamu unnig n timmuzɣa, imi d nettat i turet n wedlis amaziɣ di rreḥba-yagi, aseggas-agi tesdukel, nnig yedlisen i d-yessufuɣ, xemsa n tezrigin i yennumen xeddment adlis s tmaziɣt, tiddukla Numidya, d weḥric i wesnas (application)« AZUL », neɣ lmed s unecraḥ, wigi akk dduklen di yiwet n temkact i d-iṣaḥen i useqqamu unnig n timmuzɣa, nella nessaram, a d-tḥaz amkan meqqren, ideg i tezmer a d-tessebgen udem n tmaziɣt akken ilaq deg rreḥba tagraɣlant yecban tagi.
Si tama-s tiddukla Numidya n Wehran tikkelt-agi ur truḥ ara ifassen d ilmawen, imi i tegla s snat n temɛayin s CD: « Abẓiz d yizi » akk d « Bu tkercett », sin ifuras-agi imaynuten, i warrac i d-yeffɣen s talɣa igerrzen aṭas, ama si tama usiẓreg neɣ isunaɣ, deg CD ad naf tamɛayt s tira akk d ṣṣut ugar ɣef isunaɣ, d ayen yeǧǧan inebgawen n rreḥba-agi, i d-yekkan si tama-s ur ttɛeddayen ara mebla ma glan s yiwet neɣ snat. Ula d imazzagen n wedlis ssreḥben yes-s aṭas, ɛeǧbent-asen. Rreḥba-yagi d tagnit daɣen i timliliyin d imazzanen n tira d usiẓreg akk d tɣamsa, imi ugar ɣef temsikent s tamecṭuḥt n snat temɛayin-agi, akk d wesɛeddi n CD-nsent deg uselkim ar tama n temsikent, llant-d daɣen temliliyin ama deg umaṭṭaf wis-sin, anda i yettikki gma-tneɣ Bakli Weɛmara, di yiwet tedwilt i d-yewwin ɣef rreḥba-yagi anda i d-yella weskasi weskasi ɣef usiẓreg n tmucuha d termit n tiddukla Numidya di taɣult-agi, gar-asen snat n tmucuha-yagi i d-yeffɣen, am wakken daɣen i d-tella tinubga ar tedwilt di tiliẓri tazzayrit tis-rebɛa (TV4), ugar ɣer tidiwennin d yeɣmisen.
B. MEQQRAN