Iruḥ yeǧǧa-d agerruj ur nkeffu, ayendin d idlisen, tisuqilin d waṭas n yisaragen i iga. Dda Ɛebḍella d win yumnen seg yiseggasen-nni n 50 belli tamaziɣt ɣur-s amkan-is, tamaziɣt d agerruj am nettat am yakk tutlayin n umaḍal, ur yerǧi ara adabu ad tt-yerr d tutlayt tunṣibt akken ara yebges, ad yekker ad yaru neɣ ad yennaɣ fell-as, maca netta seg zik iḥemmel-itt, yura yes-s, yemmeslay yes-s, yennuɣ fell-as, yeqdec fell-as, isem n Dda Ɛebḍella deg umezruy n tmaziɣt ad yeqqim i lebda, ur iseffeḍ ara am Dda Lmulud, Dda Aɛrab Besɛud, Dda Sliman d wiyaḍ.
Dda Ɛebḍella yettuneḥsab d ababat n tsekla d yimyura n tmaziɣt deg umalu n tmurt, deg waɣir n Wehran, yuzzel, yeɛteb acḥal d iseggasen, awi-d kan tamaziɣt ad tili. Ur ntettu ara belli Dda Ɛebḍella d amjahed di tegrawla tazzayrit, yettwaḥbes deg useggas n 56 di Sidi Belɛebbas, ḥekmen fell-as s 10 n yiseggasen n tkurmut, yedder tamḥeqranit d maḥyaf d leɛtab deg waṭas n leḥbas yecban Berwabeyya, Lambaz d Wehran.
Asmi i d-tḥella Lezzayer azarug, Dda ɛebḍella yexdem d axeggaḍ akken ara yessider tawacult meqqren, deg yiwen wakud ideg yecɣel daɣen d yidles-is, ixeddem ticeqqufin n umezgun, isefra … Ula d tidukliwin tidelsanin yella wamur-is, imi yeslul-d tiddukla tadelsant Asirem ar tama n Kamal Nayt Zerrad, d tin i yuɣalen umbeɛd d tiddukla Numidya i ixeddmen am uzal am yiḍ ɣef tneflit d umhaz n tmaziɣt di Wehran deg yiseggasen-nni yezrin.
Dda Ɛebḍella yeǧǧa-d ugar n 20 yedlisen, gar-asen ad naf : tawaɣit n tayri, amjaḥ (ungalen), rubaɛyat n Ɛumer xeyyam (tasuqilt), tisri n tayri (isefra) …atg. Ɣas yemmut Dda Ɛebḍella, maca yeǧǧa-d isem-is deg umezruy, akken i yenna Da Lmulud deg wawal-is : “Yella walbaɛḍ yella ulac-it, yella walbaɛḍ ulac-it yella”.
Yettwakkes-d si tesɣunt « Aselmad » uṭṭun wis 4.
