Ata wansi d-tekka tenfalit-agi:
Mi ara mqabalen sin ad uraren tiddezt (tiddaz), ad gen qbel tisɣar ara sen-d-ibeggnen anwa ara yuraren d amezwaru. Ad yeddem yiwen seg-sen sin ileqqafen, wa d acebḥan, wayeḍ d aberkan. Ad yeffer ifassen-is defir weεrur-is, ad yerr yal aleqqaf deg yiwen ufus war ma yeẓra wexsim-is anda yekmes aleqqaf acebḥan. Sakin ad as-imekken tummaẓ-is i snat, i wayeḍ, ad yefren yiwet seg-sent. Tazelmaḍt neɣ tayeffust. D amyurar ara d-iṣaḥ ucebḥan ara yebdun taserrasut uleqqaf amezwaru.
Kkiɣ-awen deg wawal: Turart-agi n tiddezt, zikenni tettwajraḍ ɣef teblaṭ iɣef ttɣiman di tejmaεt (am tahin di tewlaft). Tesεa 25 txejḍatin yemdurraren 5 x 5. Yal yiwen yessefk-as tamrawt ibeεεayen neɣ ileqqafen yemgadan (10 icebḥanen neɣ 10 iberkanen). Mi rsen merra ibeεεayen-nni, yal wa di texjiṭ-is, ttɣimant-d 5 txejḍatin d tilmawin iwakken ad yili wanda ara smimiḍen ileqqafen-nsen.
Mi ara ten-srusuyen akkenni s nnuba, d win iḥercen ara iwennεen lɣeṭṭ akken ur yettaf ara iman-is uxsim-is. Mi kfan taserrasut ileqqafen; ad yebdu umezwaru aneqqel n uleqqaf i iwala ad yesseks yes-s s atellet. Atellet, mi ara yessiweḍ bab-is ad yessemdurrar 3 ileqqafen. Yal tikkelt mi ara itellet umyurar, ad as-yelqef yiwen uleqqaf i uxsim-is. Ma yeḥrec, ur εeddan ara fell-as izaylalen, ad yefren aleqqaf ara s-igen abrid i wakken ur d as-yettaǧǧa ara i wayeḍ ad itellet. Win yewεan, ma yeẓwer, ad yeḥres wayeḍ alamma yessufeɣ, ad terr tmara alamma iga-as-d abrid war lebɣi-s i wakken ad itellet daɣen. Simmal itett-as ileqqafen, simmal yettεekkir-as turart i uxsim-is. Ma yewεa ad as-ig imenniqel, dɣa tefra tfuk. Ad yekkeεkeε d taḍsa, ad as-yini: “D imenniqel, d asenqiqel!” Yettusemma, yal mi ara yesmimeḍ aleqqaf, ad itellet. Yal tiyita ad as-yečč yiwen; win deg win alamma yessenger-as-ten.
Yella wanda, win yeεban i tiddezt, am win umi yewqem ṛṛay, yezmer ad yessufeɣ wayeḍ bagu si tazwara. Mi ara srusuyen akken ileqqafen, ma igerrez-as lɣeṭṭ, ad t-iseqqi. Ad as-ineɣ tikemmict ileqqafen-nni i s-d-yeggran deg ufus-is ma yella ur d as-yettaǧǧa ara adeg anda ara yessers aleqqaf war ma yessemdurrar 3 wa zdat wa. Axaṭer, skud ur risen ara merra ileqqafen, yiwen ur yesεi azref ad itellet.
Ihi, win iseqqan wayeḍ, ini yeddem-itt. Teddez tebrez.
Daymi s-qqaren: “Ṛṛay, am tiddezt; mi k-seqqan, ddem-itt.”
Racid n Tiɣilt 05/17
