AMEDYA N YINELMADEN

0

Ffɣen-d yinelmaden deffir n yiselmaden-nsen s annar n uɣerbaz ad ẓẓun isekla, s teḍsa d unecraḥ. Nnejmaɛen d agraw, yenna-asen-d unemhal n uɣerbaz :

– Win i iteẓẓun isekla, isenkkar-d tudert… Isekla sɛan tudert am nekni, d nutni i aɣ-d-yettaken azwu.images (30)

Tiziri d Uɣilas, d sin yinelmaden uḥricen, ufraren-d akk nnig wiyaḍ, ssnen-ten akk deg uɣerbaz. Tenna-as Tiziri:

-Ttaken-aɣ-d diɣen tili…

Ikemmel unemhal deg wawal-is:

-D tidet a Tiziri, ttaken-aɣ-d tili. Yerna isekla ttḥaraben fell-aneɣ…

Yenna-as Uɣilas :

-Amek ?

– Aɣebbar akk yellan deg yigenni, aseklu ijebbed-it yettarra-t ɣer wakal akken nekni ad nili s tezmert-nneɣ tameqqrant. I as-yerra unemhal.

Yesteqsa yiwen Aɣilas :

-Acḥal i yettidir useklu ?les_plus_beaux_arbres_du_monde_hetre_de_ponthus

-Isekla ttidiren aṭas. llan isekla i yettidiren alma d semmus n twinas n yiseggasen (500) . Ɣef waya, ilaq ad nḥader ɣef yisekla. I as-yerra unemhal.

Inelmaden kkren s uẓu n yisekla d yiselmaden-nsen, wa yeqqaz, wa iteẓẓu. Deg wezniq, imdanen ur d-cqin ara deg twennaḍt ideg ttidiren. Abrid yeččur d tiqraɛtin,  icekkaren, d lekwaɣeḍ… Walan yinelmaden n uɣerbaz, yiwen wergaz yečča tabanant, iḍegger taqerɛet ɣer lqaɛa. Tluɛa-t Tziri tenna-as :

-Ayen i t-ḍeggreḍ taqerɛet ɣer laqaɛa ? ayen i tessamaseḍ tawennaḍt-nneɣ ? Ur teẓriḍ ara belli yezmer ad tesseɣliḍ albaɛḍ deg-neɣ. Muqel kan ma tettwaliḍ iḍumman di lqaɛa, tawennaḍt-nneɣ zeddiget !

téléchargement (1) Yenna-as Uɣilas :

-Deg uɣerbaz-nneɣ, yal tiɣmert nessers tanefrast. Nekkni yal ass nleqqeḍ lekwaɣeḍ deg uzniq n uɣerbaz-nneɣ. Aselmad-nneɣ yenna-aɣ-d ur ilaq ara ad nessames tawennaḍt.

 

Din din argaz-nni yeddem taqerɛet-nni yewwi-tt ar tnefrast, yenna-asen s teḍṣa :

-Surfet-iyi ay arrac.

 

Ikemmel abrid-is urgaz-nni, iruḥ. Yenna-asen Uɣilas :

-Ilaq ad nesbedd igalisen, dagi.

 

Tenna-asen Tziri :

-D tidet ! akken  lɣaci ur ttḍeggiren ara iḍumman-nsen deg yizenqan n uɣerbaz-nneɣ.

 

Imi i asen-d-yesla uselmad–nsen, dɣa yusa-d ar ɣur-sen, yenna-asen :

-D acu akka tettmeslayem gar-awen ?

 

Yenna-as Uɣilas :

-Ilaq ad naru tiplakin, akken lɣaci yettawin abrid-agi ur ttḍeggiren ara iḍumman-nsen deg ufrag n uɣerbaz-nneɣ

ilaq ad yeqqim uɣerbaz-nneɣ zeddig…

 

Yerra-as uselmad :

-Ayagi d ayen isehlen ay uḥricen…

 

Iruḥ uselmad-nni yewwi-asen-d kraḍ n telwiḥin. Uran deg yiwet :

-Ḥadret tawennaḍt-nneɣ.

 

Di tis snat uran deg-s :

-Aseḥbiber ɣef twennaḍt, d llsas n tudert.

 

Di tis kraḍt uran deg-s :

-Tawennaḍt zeddigen = tazmart iǧahden

 

Sbedden tilwiḥin-nni i uran akken deg yal tiɣmert anda ara tent-walin lɣaci.

Yenna-asen uselmad-nni :

-Akka tura ad yizdig ugar uɣerbaz-nneɣ. Yyaw tura ad nesw isekla-agi i neẓẓa ass-a. Yal win yeẓẓan aseklu ad t-isew

 

Inelmaden, yal yiwen yebda yesmaray aman ar uxemmuj n useklu i yeẓẓa, cennun s yiwet n taɣect:

Ad d-nagem aman di tala

Akken ad nsew isekla

 

Yesla-asen-d unemhal n uɣerbaz imi cennun s teḍṣa, yusa-d ɣur-sen, nutni mazal cennun s yiwet n taɣect :

Ad d-nagem aman deg umdun

Ad nsew isekla akken ad gmun,

 

Yenna-asen unemhal :

-Tanemmirt-nwen ay inelmaden uḥricen.  D wagi i d amedya igerrzen, tefkam-d tugna icebḥen i uɣerbaz-nneɣ… Ihi imi iyi-tesferḥem anect-a, heyyaɣ-awen-d yiwet n tmuffirt.

 

Inelmaden akk nnan-as-d s yiwet n taɣect :

-D acu-tt ?

 

Azekka ad ken-nawi ad tmerrḥem ar teftist n Tegzirt, kunwi akked yiselmaden-nwen.

 

Inelmaden ferḥen. Cennun s yiwet n taɣect :

 

-Azekka ad nruḥ ar teftist

Ad neccef  alma d tameddit…

 

-Azekka ad nruḥ ad nḥewwes

Lxiq ad t-nekkes…

 

-Azekka ad nruḥ ad nmerreḥ

Ad neccnu, ad necḍeḥ…

 

Azekka-nni uqbel ad yali yiṭij, lkaṛ yewweḍ-d yeḥbes deg tewwurt n uɣerbaz. iselmaden bdan sekcamen inelmaden yiwen yiwen, wa deffir wa, alarmi ulin akk.

Yenna-asen unemhal  :

-Abrid n talwit, sarameɣ-awen ass ameggaz.

 

Deg ubrid, inelmaden cennun s yiwet n taɣect :

  • Abrid-nneɣ ar teftist

D tilawt mačči d targit..

 

  • Abrid-nneɣ ar teftist

Ad nmerreḥ alma d tameddit…

 

Aɣilas d Tziri ttmuqulen-d seg ṭṭaq n lkaṛ ar beṛṛa. Tenna-as Tziri :

-Uh ! abrid yeččur d iferḍan, tiqreɛtin, icekkaren, lekwaɣeḍ …

 

Yenna-as Uɣilas :

– D aɣerbaz-nneɣ i izeddigen.

-Yerna yal amkan llant deg-s teplakin, gedlen aḍegger n yiḍumman… I as-terra Tziri

-Ayen ɛni lɣaci ur ttqadaren ara tiplakin-agi ? I as-yenna Uɣilas

 

Yesla-asen-d uselmad-nsen, yenna-asen :

-Lukan lɣaci ad qadren akk tiplakin-agi, ibedden d awezɣi ad ilin yiḍumman  deg ugama.

 

Tenna-as Tziri :

-Ihi ayen akka ay aselmad-nneɣ ?

– D astehzi i yellan. I as-yerra uselmad-nni

 

Yenna-as Uɣilas :

-Amek ihi i d tifrat-is Ay aselmad-nneɣ ?

-D kunwi Ay uḥricen. Ih, d kunwi ara asen-yemlen i yimeqqranen… I as-yerra uselmad-nni

 

Inelmaden bdan cennun s yiwet n taɣect :

-Nekkni nḥemmel tezdeg…

 

Mi wwḍen ar teftist, ufan-tt teččur d lɣaci. Inelmaden ḥaren ad kecmen s aman, ḥaren ad ccfen. Yal wa aqrab-is deg uɛrur-is, ruḥen wa deffir wa. Yenna-asen uselmad-nsen :

– Ruḥet sin sin kan, myuṭṭafet ifassen, Wa deffir wa. Ass-agi yerked yilel, rsen waman.

 

 

Tteddun sin sin, afus deg ufus, ttmagaren-d iḍumman, icekkaren, tiqreɛtin, zzǧaǧ, tibewwaḍin n lyaɛut … Inṭeq Uɣilas :

-Ula da deg yilel  llan yiḍumman !

-Uh ! ula deg waman llan … Umsen! I as-tenna Tziri

-Uh ! ur nezmir ara ad neccef, aman n yilel umsen. Ččuren d tiqreɛtin, d icekkaren…  Ma yella neccef , yezmer ad naḍen. I as-nnan yinelmaden i uselmad-nsen.

 

Yeddem uselmad-nsen, yefka-asen tiligatin yenna-asen :

-Axx-ten, elset tiligatin i yifassen-nwen, ad nekker ad nelqeḍ kra n yiferḍan-agi ɣer icekkaren imeqqranen.

-Aṭas, mačči d ayen iwumi nezmer a mass. I as-nnan yinelmaden

-Ih! ḥsiɣ,  tiftist meqqret, maca tigawt-nwen tugar temɣer n teftist-agi. Yerna ad teqqim d amedya ara yennalen akk imdanen yellan dagi ass-a. Ad tili d tamsirt i yimeqqranen… D tigawt ara yeẓẓun deg wallaɣen n yimdanen iḥedren ass-a. S wakka ula d nutni ad neḥcamen ur ttḍeggiren ara iḍumman-nsen anda ma ufan, ad ten-ttawin ɣer tnefrasin. Akken ad teqqim teftist akked twennaḍt zeddigit.

 

Yeddem-d uselmad-nni  ukuẓ n leṣnaf n yicekkaren imeqqranen, yal wa s tiɣmi-ines, yebḍa-ten ɣef yinelmaden-is. yenna-asen : 

 

-Acekkar awraɣ leqḍet-d ɣer-s iḍumman n plastik. Acekkar azegzaw i zzǧaǧ. Acekkar aḥlaḥal i lekwaɣeḍ. Acekkar aberkan i yiḍumman-niḍen..

 

Inelmaden lsan tiligatin-nsen, ruḥen d tarbaɛt, yal sin acekkar deg yifassen-nsen, leqḍen-d iḍumman. cennun :

-Nekkni d arrac imecṭaḥ,

Nḥemmel tezdeg d ṣṣeḥ

 

Lɣaci imi ten-walan akken, kkren-d leqḍen ula d nutni iḍumman-nsen. Inelmaden tteddun cennun, alarmi i d-jemmɛen akk iḍumman, sduklen-ten ɣer tnefrasin yellan dinna. S tigawt-a, tettban-d teftist zeddiget…

 

Snemren-ten akked wid akk yellan dinna, ɣef tigawt-nsen. Ccfen yinelmaden-nni almi d tameddit, ḍṣan, ččan, swan… Jemɛen-d lqecc-nsen,  nejmaɛen ar lkaṛ, abrid-nsen s axxam.

 

Deg ubrid n tuɣalin ṭṭsen akk. Yal wa isenned ar tayet n umdakel-is. Yal wa yewwi-d tamsirt deg wallaɣ-is. Yeẓẓa-tt deg wul-is.

 

 

 

 

 

 

 

 

Share.

About Author

Fahim MESƐUDEN, d yiwen n umedyaz u d amyaru s tutlayt n teqbaylit, ilul ass n 07/05/1981 deg taddart n Uzaɣar Ɛwana, taɣiwant n Yiɛekkuren. Deg useggas n 1986, imawlan-is ruḥen zedɣen di taddart n Agarsafen, taɣiwant n at-yeǧǧer, id-yezgan γer tama n teẓgi n ukefadu, anda yella yezdeɣ ass-a, sebba n waya d aɣerbaz ay-s ulac deg taddart i deg-i s teɣli timiḍt. Deg useggas-nni i yekcem s aɣerbaz amezwaru n taddart-agi. Seg uɣerbaz alemmas ar tesnawit, si tesnawit ar tesdawit, yeffeɣ-d s-yinna deg useggas n 2004, s ugerdas n DEUA en électronique. Yessker-it-id umussu adelsan n taddart-is, d netta it ideggren ad iḥemmel tira, tamedyazt, d yidles sumata. Seg ujrured ar waḥrured, seg waḥrured ar tikli. Skud teddun wussan, yettidir timsal, tidyanin, allaɣ-is yesseklas-itent d isefra akken ad idirent i lebda. Si temẓi-s i yekčem γer wannar n yidles, imi kra n win i ikečmen deg-s yekkat ad-yawwi amaynut. Fahim yella d imceggaε n Radyu n Numidya deg useggas 2011, aṭas n tedwilin i yessekles i umaṭṭaf-agi. Deg useggas n 2014 yebda yettaru imagraden s teqbaylit deg waγmis « Tiɣremt » s yisem « Tansa n Talsa ». Xas akken abrid n usiẓreg ḥarcaw, netta yelḥat ḥafi, yerẓa asalu-s deg useggas n 2013 yessufeɣ-d adlis-ines amezwaru, di teẓrigin RichaELSAM, azwel-is : « Tiyersi (le nœud) », d ammud n yisefra deg-s 38 isefra. Aseggas mbaɛd, di 2014, yerna yessufeɣ-d adlis niḍen, d ammud n tullisin akked tneqqisin, azwel-ines « Timsirin n ddunit ». D adlis-is d-yeffɣen di teẓrigin n SEFRABER di tmurt n Fransa. Ugar n waya, Fahim ass-a d aselmad n tiliktrunit deg uɣarbaz n uselmed n lḥerfat n BUXALFA ( Tizi Uzzu )

Leave A Reply