Tamsirt n tlata n yiɣerbula sɣur Sukraṭ.

2

Sukraṭ, d yiwen ufiluzuf aqbur yeddren di lqern wis 5 send talalit n Sidna Ɛisa.

Yiwen was, yiwen n wemdakel-is yerza ar ɣur-s yenna-as :

-Bɣiɣ ak-d-hedreɣ ɣef wemdakel-ik.

Yerra-as-d Sukraṭ, yenna-as :

-Arǧu ! Weqbel ad iyi-d-tiniḍ ayen akka tebɣiḍ ad iyi-t-id-tiniḍ, bɣiɣ ad ẓreɣ ma yella tessafeḍ-t neɣ ala ?

Winna yewhem, yenna-as :

-Amek, ur fhimeɣ ara d acu tebɣiḍ ad iyi-t-id-tiniḍ ?

Yerra-as Sukraṭ, yenna-as :

-Ihi ! Ayen akka i tebɣiḍ ad iyi-t-id-tiniḍ, ilaq-ak ad t-tessifeḍ, ad t-tesɛeddiḍ ɣef tlata n yiɣerbula.

Yerra-as-d winna, yenna-as :

-Tlata n yiɣerbula ! Amek ?

Yenna-as Sukṛaṭ :

-Ih ! tlata n yiɣerbula a winnat.

Asɣerbel amezwaru d win n TIDET. Ayen akka i tebɣiḍ ad iyi-t-id-tiniḍ d tidet, neɣ ala ?

Yerra-as-d winna, yenna-as :

-Tidet kan, ur ẓriɣ ara, akka i sliɣ heddren medden…

Yenna-as Sukraṭ :

-Ulac ɣer-s, ad yili ahat tesɛeddaḍ-t deg uɣerbal wis sin, win n LEHHU. Ayen akka i tebɣiḍ ad iyi-t-id-tiniḍ, ma yella mačči d tidet, ad yili ahat d ayen yelhan ?

Winna yerra-as-d, yenna-as  :

-Ala, mačči dayen yelhan…

Yenna-as Sukraṭ :

-Hum ! Ulac ɣer-s. Ad neɛreḍ tura ad t-nesɛeddi deg uɣerbal wis-tlata, ammer ahat ayen akka i tebɣiḍ ad iyi-t-id-tiniḍ ad iyi-yennfeɛ ?

Yerra-as-d winna, yenna-as :

-Ad k-yenfeɛ ! Ur cukkeɣ ara.

Yecmumeḥ-as Sukraṭ, yenna-as :

-Ma yella ayen akka i tebɣiḍ ad iyi-t-tiniḍ mačči d tidet, ur yelhi ara, ur iyi-ineffeɛ ara, smenyif axir ur ẓerreɣ ara d acu akka i tebɣiḍ ad iyi-t-id-tiniḍ.

Asmuḥyet sɣur Fahim MESSAOUDENE

(Socrate, Les trois tamis)

Share.

About Author

Fahim MESƐUDEN, d yiwen n umedyaz u d amyaru s tutlayt n teqbaylit, ilul ass n 07/05/1981 deg taddart n Uzaɣar Ɛwana, taɣiwant n Yiɛekkuren. Deg useggas n 1986, imawlan-is ruḥen zedɣen di taddart n Agarsafen, taɣiwant n at-yeǧǧer, id-yezgan γer tama n teẓgi n ukefadu, anda yella yezdeɣ ass-a, sebba n waya d aɣerbaz ay-s ulac deg taddart i deg-i s teɣli timiḍt. Deg useggas-nni i yekcem s aɣerbaz amezwaru n taddart-agi. Seg uɣerbaz alemmas ar tesnawit, si tesnawit ar tesdawit, yeffeɣ-d s-yinna deg useggas n 2004, s ugerdas n DEUA en électronique. Yessker-it-id umussu adelsan n taddart-is, d netta it ideggren ad iḥemmel tira, tamedyazt, d yidles sumata. Seg ujrured ar waḥrured, seg waḥrured ar tikli. Skud teddun wussan, yettidir timsal, tidyanin, allaɣ-is yesseklas-itent d isefra akken ad idirent i lebda. Si temẓi-s i yekčem γer wannar n yidles, imi kra n win i ikečmen deg-s yekkat ad-yawwi amaynut. Fahim yella d imceggaε n Radyu n Numidya deg useggas 2011, aṭas n tedwilin i yessekles i umaṭṭaf-agi. Deg useggas n 2014 yebda yettaru imagraden s teqbaylit deg waγmis « Tiɣremt » s yisem « Tansa n Talsa ». Xas akken abrid n usiẓreg ḥarcaw, netta yelḥat ḥafi, yerẓa asalu-s deg useggas n 2013 yessufeɣ-d adlis-ines amezwaru, di teẓrigin RichaELSAM, azwel-is : « Tiyersi (le nœud) », d ammud n yisefra deg-s 38 isefra. Aseggas mbaɛd, di 2014, yerna yessufeɣ-d adlis niḍen, d ammud n tullisin akked tneqqisin, azwel-ines « Timsirin n ddunit ». D adlis-is d-yeffɣen di teẓrigin n SEFRABER di tmurt n Fransa. Ugar n waya, Fahim ass-a d aselmad n tiliktrunit deg uɣarbaz n uselmed n lḥerfat n BUXALFA ( Tizi Uzzu )

2 Comments

  1. mokrane B

    Tanemmirt a Fahim ɣef temsirt-agi nniḍen, d awal lɛali, neqqar nekni s leqbayel « aḥebber qbel adebber », amdan ma yebɣa a d-yini neɣ ad yexdem kra, ilaq-as uḥebber, ma yella wawal-nni ad iḍur kra n walbaɛḍ, ɣas ulamma d tidet, yella wanda i ilaq ur tt-id-neqqar ara, ma yella awal-nni ad yebḍu ger yemdanen, neɣ ad yili d sebba n lemḍerra

  2. d awal iweqmen, lemmer yal wa ad yexdem yis-s yili neqsen wezgen iɣeblan yellan di tmurt. tigi n medden tedha kan tezzaḍ imeslayen n wiyaḍ, ttawin ttarran di lehdur, argaz tameṭṭut, ur ẓrin akken tenniḍ ma yella d tidet, neɣ d ayen yelhan, neɣ dayen ara inefɛen medden.
    ssarameɣ ad nili am tzizwa, anda ddant kessent ala ayen n lɛali, ttmuddunt-d i medden tizeṭ i wučču d ddwa i tfekka.

Leave A Reply