Ansayen n Yennayer

1

Yennayer d aggur amenzu n useggas n Imaziɣen, d ansay yellan deg waṭas n tmura anda ttidiren Imaziɣen deg ukuz n tɣemmar n ddunit. 950 n iseggasen send talalit n Sidna Ɛisa, Cacnaq, agellid Amaziɣ, ad yesbedd tagelda-ines tis 22 di tmurt n Maṣer, aseggas-nni ideg i yerbeḥ ugellid-agi amaziɣ ṭṭrad-ines gar-as d Iferɛunen. Azal 235 n iseggasen d Imaziɣen i yesselḥuyen Tamurt n Maṣer. Seg yimir-nni i bdan Imaziɣen ḥessben ussan, yebda uwitay n Imaziɣen. Ad naf yennayer yebḍa ɣef sin yeḥricen, amenzu n yennayer : i umi neqqar daɣen tawwurt n useggas akked Lɛezla n yennayer, d ass wis 15.

Mazal ar ass-a imaziɣen sfuggulen yennayer. Yal tawacult tettmagar-it s imensi n bu sebɛa isufar, n useqqi aquran : irden, tajilbant taqurant, lubyan bu timmi (lubyan n leqbayel), talubyant tamellalt, ibawen, lḥemmeẓ, leɛdes. Timezla n iyuzaḍ, maca ilaq ayaziḍ ad yili d win n tmurt, d bab-is ara t-id-yessekren deg wexxam-is, ad t-yefk d asfel. At zik akka ! Ad naf yal axxam yettheggi imensi n yennayer. Ass-nni ɛerḍen-d tiwelliyin-nsen akken ad ččent deg yimensi-nni, d azamul n yiseɣ akked tegmat. Iɛeggalen n wexxam, mi ara qqimen ad ččen imensi. Amɣar n wexxam akked wergaz ad ččen tidmarin, acku d netta i ixeddmen ɣef wexxam. Arrac tetten timeṣṣaḍin akken ad imɣuren ad grurzen. Tullas tettent tafriwin, acku yiwwas ad srifgent seg wexxam, ad zewǧent. Tamɣart akked tmeṭṭut tettent ayen d-yeqqimen deg uyaziḍ-nni, ttsummun-t iɣsan.

Tulawin, sewwayent daɣen tiɣrifin, tiḥbulin (lesfenǧ), skarayent aɣembabu n ucayaḍ deg tenwalt, qqarent : « Acayaḍ i tekkes acelyaḍ ». Daɣen ttkeḥḥilent i timmi-nsent d wallen-nsent s imeṭṭi n uzzu, ssirident leḥwal n wexxam, tezzint-d i wexxam s tseḍwa n yilili (taseṭṭa n yilili agellid), ttezraqent tisgiwin n wexxam. Tekksent inyen n lkanun n useggas yezrin, ttɛawadent imaynuten. Ilmeẓyen tteffɣen ɣer izenqan, s ignan n taddart, tturaren.

Urar yettwasnen s waṭaṣ, d « amɣar n uceqquf », yella wanda nniḍen qqaren-as «Buɛfif » di kra n temnaḍin nniḍen qqaren-as : « Ayrad », d kra akken n yiselsa akked tgelmusin (masques) i d-xeddmen s teqrucin swayes ssenduyen ayefki. Yal ilemẓi ad yerr tagelmust i uqadum-is ad teddun ad cennun, ad sṭebṭuben ɣef tewwura n yixxamen n taddart, yal tameṭṭut ad ten-id-temmager s taḍsa, a sen-d-tefk taɣawsa tebɣa, ta d idrimen, ta d timellalin, ta d aɣrum, …

Di lɛezla n yennayer, deg wass wis 15, tettili-d ttesḍila i igerdan. Igerdan ur newwiḍ ara aseggas asen-kksen kan ciṭuḥ i temzurt-is. Itekkes-as-tt umeqqran n wexxam, qqaren-d akken ad yiɣzif leɛmer-ines. Igerdan iɛeddan aseggas ttseṭṭilen-asen akk acebbub-nsen (acekkuḥ). Imekrazen (ifellaḥen) si tama-nsen tezzin-d i yigran-nsen s ujeǧǧig n yilili.

https://www.youtube.com/watch?v=QOlag4G3lJ0

Share.

About Author

Fahim MESƐUDEN, d yiwen n umedyaz u d amyaru s tutlayt n teqbaylit, ilul ass n 07/05/1981 deg taddart n Uzaɣar Ɛwana, taɣiwant n Yiɛekkuren. Deg useggas n 1986, imawlan-is ruḥen zedɣen di taddart n Agarsafen, taɣiwant n at-yeǧǧer, id-yezgan γer tama n teẓgi n ukefadu, anda yella yezdeɣ ass-a, sebba n waya d aɣerbaz ay-s ulac deg taddart i deg-i s teɣli timiḍt. Deg useggas-nni i yekcem s aɣerbaz amezwaru n taddart-agi. Seg uɣerbaz alemmas ar tesnawit, si tesnawit ar tesdawit, yeffeɣ-d s-yinna deg useggas n 2004, s ugerdas n DEUA en électronique. Yessker-it-id umussu adelsan n taddart-is, d netta it ideggren ad iḥemmel tira, tamedyazt, d yidles sumata. Seg ujrured ar waḥrured, seg waḥrured ar tikli. Skud teddun wussan, yettidir timsal, tidyanin, allaɣ-is yesseklas-itent d isefra akken ad idirent i lebda. Si temẓi-s i yekčem γer wannar n yidles, imi kra n win i ikečmen deg-s yekkat ad-yawwi amaynut. Fahim yella d imceggaε n Radyu n Numidya deg useggas 2011, aṭas n tedwilin i yessekles i umaṭṭaf-agi. Deg useggas n 2014 yebda yettaru imagraden s teqbaylit deg waγmis « Tiɣremt » s yisem « Tansa n Talsa ». Xas akken abrid n usiẓreg ḥarcaw, netta yelḥat ḥafi, yerẓa asalu-s deg useggas n 2013 yessufeɣ-d adlis-ines amezwaru, di teẓrigin RichaELSAM, azwel-is : « Tiyersi (le nœud) », d ammud n yisefra deg-s 38 isefra. Aseggas mbaɛd, di 2014, yerna yessufeɣ-d adlis niḍen, d ammud n tullisin akked tneqqisin, azwel-ines « Timsirin n ddunit ». D adlis-is d-yeffɣen di teẓrigin n SEFRABER di tmurt n Fransa. Ugar n waya, Fahim ass-a d aselmad n tiliktrunit deg uɣarbaz n uselmed n lḥerfat n BUXALFA ( Tizi Uzzu )