Tamedyezt d awal d ccbaḥa-ines. Tettakk-as afud i tutlayt akken ad tidir i lebda, ur tnegger ara. Ahat ɣef waya i d-kkrent kra n temnaḍin n tmurt n Leqbayel ttheggint-d timliliyin n tmedyezt n tutlayt taqbaylit. Ma nebder-itent-id ad naf tin n At Jennad (Tiddukliwin Tidelsanin n Yusef Uqasi, Si Muḥend u Mḥend) tettili-d deg unebdu. Tin n At Smaɛel (Adrar n Fad), nettat deg tefsut. Ma d tis kradet d tin n Uqbu (Itri Adelsan n Uqbu) i d-yettilin deg tegrest. Mebla akukru, nezmer ad d-nini tiddukliwin-a tidelsanin d iɣerbazen n tmedyezt n tmurt n Leqbayel. Ttakkent tagnit i yimedyazen ttemlilin, ssawalen-d i yisefra-nsen, ttembeddalen tikta, aya yettawi ɣer yiwen n yiswi: asnerni n tutlayt taqbaylit. 
Dɣa, imi deg tegrest i nella, Tiddukla Itri Adelsan n Uqbu, tessuddes-d timlilit tis mraw (10) n tmedyezt n Ssummam, seg 22 ar 25/12/2016. Thegga-d yiwen wahil adelsan amesbaɣur.
Tuɣ tannumi, yal tikkelt tettarra tajmilt i yiwen n unaẓur i d-ibanen deg unnar n tsekla neɣ n tẓuri s umata. Tebda deg Si Muḥend u Mḥend iwimi tessebded asebdad, tuɣal ɣer Muḥend Saɛid Amlikec, Nna Reḥma u Ɛissa, Saɛid Marawi, Jean Lmuhub Ɛmruc, Nur Uld Ɛmara, Kateb Yasin , Tiziri d Leḥlu, Muḥemmed Belḥanafi. Aseggas-a, tajmilt tuɣal i sin n yimedyazen yettarun tamedyezt d wayen-nniḍen a-t-a nnig n 30 n yiseggasen aya. Ssufɣen-d idlisen, kkin deg ma d kra n tfaskiwin n tmedyezt seg yiseggasen n taggara n 80. Wigi d Massaw Ɛemran Salem (Asi Yusef, Buɣni) d Malek Houd (Tazmalt, At Mlikec).
Ihi, ass amenzu Itri Adelsan n uqbu immuger inebgawen-is, gar-asen imedyazen azal n 100 yid-sen, d wid i d-yewwin idlisen-nsen ad ten-ssenzen s ubuddu ddeqs deg-sen, d wid i d-tefka tegnit. ɣef tamert tis snat n tmeddit yeḍra-d uledduy n temlilit s wudem unṣib. Aṭas i d-yefkan awal, gar-asen aselway n Tiddukla, Mass Mulud Salḥi i yennan ansuf i kra n win i d-yusan, rnan-d igensasen n tmehla n yidles d tmehla n yilmeẓẓyen d waddal. Ma d Massaw Buǧemɛa Rabaḥ amekfadu n umaṭṭaf wis sin, d Buɛlam Messusi, yiwen n umedyaz
ameqqran yekkin deg usebded n tfaska-a, fkan-dawal ɣezzif ɣef leqdic adelsan yezgan i txeddem teddukla-a, 40 n yiseggasen aya. Yuɣal iɛeddad yiwen n usaru i d-isseknen amecwar d-uwin yimedyazen Malek Houd d Ɛemran Salem deg tudert-nsen. Taggara ttunefken yidlisen “Tacemlit” i yimedyazen i d-yufraren deg tedwilt tis tẓa (9).
Tameddit yiwet n terbaɛt n yilmeẓẓyen n Yiɣil Ggilef (Naser), ASIREM, turar-d yiwet n tnezgumt “Jules Cesar” iwumi teɛǧeb aṭas i yimeshanayen.
Azekka-nni ɣef tis mraw, taselmadt deg ugezdu n tutlayt d yidles amaziɣ n tesdawit n Bgayet iwimi qqaren Massa Zulixa Mulay, tefka-d yiwen n usarag s wazal-is ɣef temhazt (evolution) n tmedtezt taqbaylit, i t-id-iḍefren d askasi.
Tameddit ɣef tis 13 d uzgen d nnuba n umedyaz iwumi tuɣal tejmilt Mass Ɛemran Salem, ad d-issiwel tamedyezt-is azal n yiwet n tsaɛet, mi ifukk yella-d uskasi.
Ɣef tis 2 d uzgen n tmeddit, tebda temssizzelt n tmedyezt, ddeqs n yimedyazen yennumen timlilit-a d kra n yimeynuten i d-yessawlen isefra-nsen.
Ass wis krad ɣef tis mraw (10), d Massa Waṭaḥ Linda, taselmadt deg ugezdu n tutlayt tamaziɣt n tesdawit n Bgayet i d-yefkan yiwen n usarag ɣef tmedyezt n tlawin deg tmurt n Laqbayel, d askasi i d-iḍefren s waṭas n tuttriwin d tririt-nsent igerrzen.
Ɣef tis 13 d uzgen, tezzi-d nnuba i umedyaz wis sin iwimi tuɣal tejmilt, Mass Malek Houd, am umezwaru yessaweḍ awal n tmedyezt-is i yimeshanayen, yuɣal yerra ɣef yisteqsiyen i d-fkan yimedyazen deg uskasi i d-iḍefren.
Ɣef tis 14 d uzgen, tkemmel temssizzelt n tmedyezt almi d amedyaz aneggaru. Taseqqamut n ufran tefka tagnit kra n yimedyazen ad d-ssiwlen isefra-nsen berra i temssizzelt.
Ass aneggaru (25/12/2016),taggara n tfaska, tella-d tikci n warrazen i yimedyazen i d-yufraren. Mi tt-tefra tseqqamut n ufran, igmaḍ n temlilit-a i d-yeffɣen d wi:
-Arraz n umzaref: Klaɣlaɣ Axmid (Tamenrast)
-Arraz n usebɣes: Ṭabu Fazya (Tizi Uzzu), Terrak Samir (Tizi Uzzu).
-Arraz wis krad: Agcarwu Murad (Bgayet)
-Arraz wis sin: Buseksu Linda (Sṭif)
-Arraz amezwaru: Ɛezzun Ḥmed (Bgayet).
Ur ttfakkaɣ ara aḍris-a melba ma nniɣ-d ixeddim agejdur i yexdem Utamarirt Akli win iwimi qqaren Akli n Tmaziɣt i iɛawzen kra tekka tfaska akken ad sɛeddin yinebgawen n temlilit ussan igerrzen. Yuklal ma nesnemmer-it.
MalekUbeẓwi.
