Sεid At Mεemmer
Warek d Wasin
Asmuḥyet
Max und Moritz – Heinrich Christian Wilhelm Busch –
Ameskar n wunuγen d Wilhelm Busch
(* 15. Yebril 1832 di Wiedensahl;
9. Yennayer 1908 di Mechtshausen)
Tazwart
Fell-asen d ihedman ara nissin
Yemcumen-agi di sin
Yerna melmi kan i ğğan tibessasin
Wigi iwumi ssawalen Warek d Wasin
Iwakken ad ilin d arrac igerrzen
Nutni s ayen nniḍen i d-qefzen,
Anda ur jeggḥen, ad rẓen
Sselben tilawin d yergazen.
S teḍsa i d-εewwlen i twuγa
Megdulet i tt-rran tuffγa,
Ma yegra-d kra n wul ur yerγa
Ḥṣut, bab-is d lhemm i yebγa.
D tifirsin neγ d tibexsisin
A tent-akren, ad cellxen deg ifurkan,
Yerna ugaren timqestin
Yilsawen-nni d asen-fkan.
Maca, abbaḥ! Ayagi diri-t!
Fell-asen a d-tezzi tmeddit!
A tent-in ihi tliwa sluγen,
Ẓret-ten di ccna, tira d wunuγen
Un commentaire
Azul,
Aya d yiwen uwezwaz seg wedlis « Warek d Wasin » i d-yesmuḥyet* umedyaz amaru ameqqran Sɛid At Mɛemmer seg wedlis « Max und Moritz » n Heinrich Christian Wilhelm Busch. Adlis-a yessazreg-it-id umeskar si texriṭ-is, atan yettnuz s talɣa tumḍint.
Seg wakken meqqer nezzeh wazal n wedlis-a, alammi sked anda ur yeṭṭif tasga talemmast di yakk tamurt n Walman. Ulac axxam ideg ur t-nettaf, ulac tamedliset ideg ur t-nettaf, ulac timkarḍit ideg ur t-nettaf, ulac aɣerbaz ur t-nesselmed di Walman. Anamek-ines : win ur nessin adlis-a ur yessin tasekla talmant !
Iswi umeskar-a Sɛid At Mɛemmer, d wa : a t-lemden ibalmuden (igerdan yeqqaren deg uɣerbaz)-nneɣ akken a d-ldint wallen-nsen, daɣen akken ad qedcen iɣuraf n wallaɣen-nsen !
Maca, di taggara n tneggura, am winna akken iceṭṭḥen i uderɣal (a yi-ssurfen watma iderɣalen acku tiderɣelt n wallen ur tneqq, d tin n wallaɣ d wul i d agejdur !), ulac aɣerbaz i t-id-yessutren, ulac timkarḍit, neɣ tiddukla, neɣ taɣiwant neɣ, neɣ… i t-id-yessutren !!!
Amek ara ɣ-yelhu yimal ? Xuḍi ula d tiɣiwanin-nneɣ ur d-cliɛent deg wannect-a !!!
Yenna-yas dda Lmulud deg wawal-is : « yehwa-yas kan i wedfel ad yewwet berra » !
Lemmer di tmura ibedden ɣef iḍarren-nsent, yili ad yekker uhetwir ɣef wedlis-a yakkd yedlisen i d-yerra ɣer tagi-nneɣ umaru amedyaz Sɛid At Mɛemmer seg imaruten imeqqranen igan aferfnas deg umaḍal d tirni!
A wi ara yewwten agejdur s tazzert !!!
• « Asmuḥyet » d awal d-yesnulfa Sɛid At Mɛemmer seg « Muḥya » acku imiren inuda ur d-yufi azal n wawal-a « adaptation » s tagi-nneɣ, dɣa ixemmem ɣef Muḥya yufa-d ssyennatifrat.
• Tura yella wazal n wawal-a « adaptation » = Azgay, d Dr Kamal n At Zerrad i t-id-yesnulfan i usuter n Ǧamal Benɛuf.
Tanemmirt
Baredman