Ma ad yemmet wedlis neɣ … ?

Am akken neẓra yakk yal tallit mi ara d-tas tettawi-d yid-s amaynut. amaynut si tama-s ayen d-yufa sdat-s ad t-yerr d aqbur. Ad yeqqim akken d amaynut alamma yennulfa-d umaynut nniḍen. Imir d netta ara yuɣalen d aqbur. Nezmer a d-nini yal amynut ad yuɣal d aqbur, yal aqbur yella yakan d amaynut.
Amdan asmi yezger si timawit ɣer tira, mačči d ayen isehlen fell-as. Di tmucuha timezwura n talsa ayen umu qqaren « Mythologie » hekkun-d d akken agellid « Ositis » asmi yebda ijerriḍen-ines imezwura deg wedɣaɣ tenna-yas tmeṭṭut-is « Isis »: « Ijerriḍen-agi-inek ad nɣen cfaya deg wallaɣ n wemdan ». Am umesmar di lluḥ. Amdan yuɣal yuḍen aṭan n tatut, ccfaya n wemdan tuɣal tedduri ddaw leɛnayan n ijeṛṛiḍen n « Ositis ».
Di tallit tamezwarut n wedlis, yella yettwaru s ufus. Amdan tuɣal tedda tmusni-ines ɣer zdat, yesnulfa-d lqaleb n talext, syen lqaleb n lluḥ, mi d as-yeḍla lmidad neɣ ssmex ssyen a t-id-yeḍbeɛ ɣef lkaɣeḍ, di taggara a d-yeffeɣ d adlis. Ma di tallit tamezwarut, llan ttarun ɣef weglim iɣersiwen. Xas akken amdan yeɛteb, lameɛna leɛtab ur yettwaḥsab. Adlis ur yeqqim ara kan deg lqaleb n lluḥ neɣ n talext. Amdan daɣen yedda asurif ɣer sdat yewwi-d amaynut tikelt-a d timacinin i izemren a d-arunt d igiman (luluf) imedyaten deg yiwet n tallit meẓẓiyen. Ayen iwumi qqaren s tefrensist « les imprimerie ». Adlis yufa iman-is yuɣal yesbed-d yiwet n tdamsa tameqqrant s tkebbaniyin timeqqranin. Amdan simal tettzad tmusni-ines simal yesnulfuy-d amaynut.
Tallit-agi deg nella d tallit n tegrawla tatiknulugit, imi d tallit n uselkim d numirik, amdan yuɣal yessenqes deg usexdem n lkaɣeḍ, imi zik kulci yettwaru ɣef lkaɣeḍ, tura d ayen nniḍen d aselkim tzemreḍ ad taruḍ war lmidad, war lkaɣeḍ. Iḍebsiyen « CD/DVD » zemren ad refden d igiman n yedlisen s tira d tugniwin d ṣṣut. Dagi adlis iḥulfa d akken yebda yettuɣal d aqbur, acku yusa-d umaynut ara t-yerren d aqbur. Asteqsi ara d-yeɣlin tura. ma d tagi id taggara n wedlis? Ma yella yezmer wemdan ad yesmeḥ deg wemdakel ɛzizen fell-as, d-yeddan yid-s s teɣzi n wacḥal n leqrun? Amdan ma yezmer ad yettu lxir i d as-yexdem wedlis, amdan dɣa yezmer ad yettu inig-ines seg tallit taqburt ɣer tallit n tatrara ṣṣehd-ines yuǧǧew-it-id seg isebtar n wedlis?