ur d-terriḍ ur d-tufiiḍ

1

Yella yiwen wergaz yeɣli-yas-d llzem ur yesɛi ara s wacu ara iqabel, iruḥ ɣer yiwen wemɣar awessar izedɣen weḥd-s. Yeqsed-it akken a s-d-yerḍel kra n yedrimen akken ad iqabel llzem-ines.
-Azul a lbaraka
-Azul. D acu k-id-yecqan?
-Aql-i yeɣli-yi-d llzem, ur sɛiɣ ara s wacu ara t-qableɣ.
-D ayagi kan! Ruḥ ɣer teḍwiqt-inna, teddmeḍ-d ayen teḥwaǧeḍ.
-Xaṭi efk-iyi-d kečč.
-Nniɣ-ak ruḥ ad teddmeḍ ayen teḥwaǧeḍ.
Argaz yemmeɣ ɣer tekwat, yeddem-d ayen yeḥweǧ, yessenmer-it, iruḥ ɣer ccɣel-is.
Zrin kra n wussan atah yuɣal-d yerra-yas-d lmana-ines, meḥsub ṭṭlaba-ines.
-Azul, aql-i rriɣ-ak-d lamana-inek, ax.
-Xaṭi ruḥ err-itt ɣer teḍwiqt, ansi i tt-id-teddmeḍ.
Argaz yuɣ-as awal, yerra-tt ɣer teḍwiqt.
Akken kan argaz mi ara yal mi ara yenkumer, ad iruḥ ɣer wamɣar awessar, yuɣal yuɣ tannumi, a d-yeddem weḥd-s, a ten-yerr weḥd-s. A d-yeddem si teḍwiqt, ad ten-yerr ɣer teḍwiqt.
Argaz yekcem-it cciṭan, yenna-yas:
-Argaz ur yettherrik ara seg wemkan-is, ur yeẓri ma rriɣ-ten-id, neɣ xaṭi.
Yegzem-itt di rray d akken tikkelt-agi ur ten-yettarra ara. Yexdem akken, ur ten-yerri ara ansi ten-id-yeddem. ddunit, am akken qqaren imezwura “tettdewwir”; yuɣal yeṭṭef-it ẓẓelṭ, iruḥ am akken yuɣ tannumi ɣer wemɣar awessar.
Yewweḍ isellem fell-as am yakan, yessuter deg wemɣar akken ad as-yerḍel.
-Ruḥ ɣer teḍwiqt a d-teddmeḍ.
Iruḥ wergaz ɣer teḍwiqt a d-yeddem, yemmeɣ yuɣal-d ufus-is d ilem ur yufi acemma.
-Atah ulac!
-Haha… ur d-terriḍ ur d-tufiḍ! Lemmer d-terriḍ yili a d-tafeḍ.

Awesome
  • User Ratings (4 Votes) 4.8
Share.

About Author

youcef achouri

Youcef Achouri d aɛeggal di tiddukla Numidya, d amedyaz, d ameskar s tutlayt tmaziɣt, ddeqs n tsuqqilin i d-yerra ɣer tmaziɣt, gar-asent: - « Cyrano de Bergerac », « Al Aǧwad »... ; am wakken daɣen i yura ungal « ijeǧǧigen n ccwal» d wammud n tullisin. Am wakken i yella daɣen seg igejda n weɣmis « Tafukt », asmi yella s ttawil n lkaɣeḍ. Yella daɣen d yiwen si terbaɛt umezgun n tiddukla Numidya. Ar tura, ddeqs seg isenfaren-ines werɛad d-ffiɣen...

Un commentaire

  1. Laougab Bouridane on

    d tidet lemmer yerri lamana ɣer wemkan-is yili d netta ara tt-yafen
    ikellex i yiman-is. Amdan d aṭemmaɛ itettu lxir, itettu tiswiɛin n ẓẓmik, n ṭṭiq iɣef d-yettɛedday.
    leḥrucegga d leqfaza mačči di temsal-agi
    amɣar awessar neɣ azemni, yezmer lḥal a s-yekkes taxriṭ-nni imi yeḥṣa mačči d bab n wawal, ulac laman deg-s.

Leave A Reply