TABRAT YEΓLIN DEG WEDFEL
D asefru n BELQASEM BENWEƐLI*
A tabrat yeɣlin deg wedfel
Yessa fell-as wegris
D tamellalt tγumm-itt temlel
Amek ara s-d-afeγ later-is
Iṭij ara t-id-yefsin ibeddel
Igenni berrik ubernus-is
A tabrat a kem-aruγ s tebrek
Amru d nekk ay d ameddakel-is
Leqlam-iw ṣṣifa-s ad tbeddel
Ad tcebbeh γ ṣṣifa n weεdaw-is
S yiles aẓidan a d-iban
D ameddakel i wakken ad yezdi lqedd-is
Ma d tagut s tikli a d-taγawel
Deffir-s a d-yegri lxeṭṭ-is
Ma d win yugin a tt-yeqbel
Ili-ken ay irgazen γ idis-is
A tabrat yeγlin deg wedfel
Yessa fell-as wegris
Teǧǧa leqlam-iw yeggujel
Ayetma cedhan isekkilen-is
Nerǧa ayyur ad yesthell
Γef tebrat a d-yawi lexbar-is
Yecreḍ-aγ-d ayen ur nqebbel
I wakken ur d-nettaf lewhi-s
Tawwurt n yeẓri-w teqfel
Mi ara d-mmektiγ teldi s imeṭṭawen-is
Uli-w γef tebrat iεellel
Iγumm-itt zzman s ideflawen-is
A tabrat yeγlin deg wedfel
Yessa fell-as wegris
Ṣebreγ lexbar-im iεeṭṭel
Ṣṣber-iw a s-geγ lḥedd-is
Lewṣaya n Ǧerǧer tekmel
Aqbayli ur yettaǧǧa nnif-is
Ma γezzif leεmer a kem-id-yaf
Weqbayli iḍuεen leεqel-is
S lexbar-im a d-yefk lemtel
Tamaziγt ad tqeεεed iferrawen-iw
Imeṭṭi n lferḥ a d-yenγel
Yal yiwen ad yaweḍ lebγi-s
A tabrat yeγlin deg wedfel
Yessa fell-as wegris
D tamellalt tγumm-itt temlel
Amek a s-d-afeγ later-is
Teεjel neγ tεeṭṭel
Mazal yettraju deg-s bab-is
A Ǧerǧer iεebban adfel
Tabrat-iw cfu f later-is
Deffir-s i d-nettabaε s lemkaḥel
Lbarud a d-yenṭeq s yisem-is
Zzman γas ma ibeddel
Yal lweqt yesεa irgazen-is
Mi ara d ḥeǧǧren idammen g rrmel
Yal yiwen ad yeεqel axṣim-is
Γef tebrat yeγlin deg wedfel
Labudd a d-iban wudem-is
Ayen yeḍran deg-neγ nettu-t
Nettsetḥi a t-id-nfekker
A s-neqqar lḥal ifut
Ur nesεi f wacu ad nehder
Sebbaḍ deg idurar nettu-t
Nedda i leḥfa neṣber
Ma d lewhi tγumm-it tagut
Lǧerra deg-neγ txeẓẓer
Nemmut nettagad lmut
Iẓekwan fell-asen i nhedder
Neddem lwerd d leεlam
Neqqar-as ad tidir Ledzayer
Lebḥer d tamurt n lḥut
Yetthenna ur yesεi aḥebber
I nekkni seg wanita tamurt ?
Ur neẓri f wacu i neṣber !
Tidet tuli γ idurar
Teǧǧa-d lekdeb a γ-yesγer
Yekkat-aγ s wesγar iεewjen
Nessusem ur nezmir a d-nehder
Ayen yeḍran deg-neγ nettu-t
Nettsetḥi a t-id-nfekker
Ugadeγ a γ-yettu lweqt
Zzman s lhemm-is a γ-yeγder
Kkret ay irgazen ad neddut
A d-naγ lhiba d leqder
Ayen urgaγ ugadeγ a yi-ifut
Uli-iw yennuγ-it ṣṣber
* Yettwanγa deg taddart-is « At Zayed n wadda » Tefreg-Lberǧ-Buεrariǧ, ass n 19 Yebrir 1991. Asefru-ya yefka-yi-t-id kra n tallit kan ngum a s-d-yessiwel lajel-is.
Ǧ.B
3 commentaires
Azul,
Ar tura, mazal udem-is ger wallen-iw. La s-ssutureɣ tamella sɣur Yakuc ameqqran, ad yeg aneffu, iman d yeɣsan-is di talwit!
Cfiɣ d akken d netta ay d amaltaɣ amenzu i d-yefkan tabzert-ines ngum a s-d-tettunefk tideggi i tiddukla Numidya.
Aṭas i nemmeslay nekk yid-s, ḥṣiɣ aṭas isenfaren i yesɛa, ira ad yeg aṭas n temsal, ladɣa segmi i twellheɣ ɣer tira yakkd welqad si timawit. Yefka-yi-d dɣa yiwen umagrad ɣef wamek sfugulen tafaska n lmulud (talalit umazan) di taddart-ines At Zayed n wadda, maca, ur ẓriɣ anda tedreg acku ula d nekk zriɣ-d kra n tegnatin n ẓẓmek.
D acu kan, ma nger tamawt i kra n tefyirin deg usefru-ya, ad naf amzun akken iḥulfa i tmettant teggar-d ɣur-s isurifen!
“Ayen urgaγ ugadeγ a yi-ifut
Uli-iw yennuγ-it ṣṣber »
G.M: Atan wazal n tira: netta ɣas teḥweṣ-it tmettant, asfru-ines yedder deffir-s!
tanemmirt ɣef lamana-agi i tessawḍeḍ i yimeɣriyen. D tidet ɣas bab-is tqemmeḍ-it lmut, lameɛna yegra-d wawal-is, yewweḍ-d ɣur ɣas ur t-nessin s tfekka-ines.
Wagi d ttbut, d akken, imdanen ttidiren s wayen i d-ttaǧǧan,
Amek ara nissin imusnawen i yeddren acḥal-aya, amek i neẓra ayen yeḍran deg umezruy, amek, amek… lemmer mačči d tira i uran medden, ǧǧan-aɣ-d igerrujen i nufa assa di tudert-nneɣ.
Azul,
D awal!.. Tanemmirt a mass Leɛgab.