Amaynut i d-yellan deg usenfar n tmendawt i d-iteddun ɣef tutlayt n tmaziɣt d taɣelnawt u d tunṣibt, yerra-d rruḥ i buhan imaziɣen i yebɣan ad ɣren tutlayt-nsen anda ma llan di tmurt-nneɣ. Di lwilaya n Mɛesker ɣef wakken i t-id-yewwi weɣmis n El Watan n wass 14 /01/ 2016, tanemhalt n trebga terfed yiwen rray akken arrac n weḥric wis sin d wid n tesnawit yebɣan ad ɣren tamaziɣt ad asen-tessewjed tizeqqiwin di lakulat anda llan waṭas n wid i tt-id-yessutren. Ccɣel atan tura deg weḥric ujerred.
Akka, « akken tebɣuḍ tiɣzifeḍ ay iḍ leqrar-ik ar d yali wass ». Ɣas adabu iḍeggel i wemrar, yesɛuẓẓeg iman-is, yeɛreḍ ad d-yekk nnig lebɣi n wid i tt-yebɣan, yugi ad yerr tamaziɣt d tunṣibt ɣas yezmer seg wacḥal aya. Maca mti lebɣi n wid i tt-iḥemmlen ireṣṣa am wedɣaɣ n tefza, dima yettnerni, ṭṭfen deg umeslay-nsen:tameslayt-nsen, yewweḍ-d wass anda i ilaq ad tili d tunṣibt. Taɣtast-agi(décision) i yerfed leḥkem ɣef usenṣeb n tmaziɣt yessefsi rrbug i yellan urzen wid i tt-yebɣan ad tt-ɣren. Dayen i ten-yeǧǧan ad ssutren lḥeqq-nsen deg uselmed n tmeslyat-nsen mebla lxuf, mebla leḥya. Ayen i nessaram d akken meḥyaf iɛeddan ɣef wid yessuturen tutlayt-agi ad yuɣal d ifadden i uxeddim d wesnerni-ines. Abrid mazal-it ɣezzif, imi amennuɣ yebdel kan tizi; seg tizi umennuɣ s isuɣan ɣer umennuɣ s tigawt d wesnefli n tmeslayt. Yezmer lḥal anda taɣtast-agi ad tessif ula d imaziɣen: ad tefren ger uɛeqqa d ukerfa.
