Nezmer ad d-nini dayen teddez tebrez, tamaziɣt tuɣal d tutlayt tunsibt.
Mbeɛd mi d-yemmeslay Ḥmed U Yeḥya ass n 05 Yennayer 2016 s yisem n uselway n tigduda deg uɛiwed n leqraya i tmendawt tazzayrit, ɣas akken d send asenfar ar tura, acu kan d wa i d lewhi neɣ d beddu iwakken tamaziɣt ad tuɣal d tutlayt tunṣibt di tmurt-is.
Mbeɛd imennuɣen i d-tenǧer tarwa n Mɛemri seg yiseggasen-nni n tmanyin ar ass-a, mačči s sshala neɣ s usterḥeb i tuɣal tmaziɣt d tutlay tunṣibt acku tɛedda-d ɣef waṭas n talliyin tiberkanin i wakken ass-a tebda tettaṭaf amkan-is iwatan ama deg uɣerbaz ama deg tmetti s umata.
Amennuɣ ɣef tmaziɣt d win yebdan ddeqs-aya, tlul-d tkadimit n tmaziɣt sɣur Dda Muḥend Aɛrab Besɛud d terbaɛt iqedcen yid-s am Ṭawes Ɛemruc d wiyaḍ di tallit-nni di tmurt n Fransa, syin yusa-d useggas n tmanyin mi d-ṭreḍqen Leqbayel ɣef tikkelt i usteɛref s tutlayt n tmaziɣt sɣur udabu i d-yemmugren aya s udebbuz. Leqbayel ur fcilen ara, yusa-d useggas n 1995 mi d-yella usunded ɣef leqraya di tmurt n Leqbayel merra, ɣas akken aseggas i iruḥen i warrac, acu kan tella-d kra n lɣella xaṭer adabu iḥuss yettwaḥres, dayen i t-yeǧǧan ad d-yefk lamer i beddu n uselmed n tutlayt n tmaziɣt deg uɣerbaz azzayri. D tannant i d-yellan di Ben Ɛeknun d kra n tamiwin-nniḍen lawan-nni i yiselmaden n tmaziɣt sɣur imnadiyen d yimussnawen deg tutlayt i yebdan aselmed-ines di kra n temnaḍin. Iɛedda wayen iɛeddan almi d-yusa useggas n 2001 neɣ tafsut taberkant. Tamaziɣt tuɣal d tutlayt taɣelnawt, aya yella-d mbeɛd mi yemmut wazal n 125 d rruḥ neɣ akter, bla ma nettu acḥal n imejraḥ.
Tutlayt n tmaziɣt i d-iɛeddan ɣef talliyin-a akk, lmut n wacḥal d yiwen, lḥebs n wiyaḍ, lejraḥ d trewla n wiyaḍ, ass-a tuɣal d tutlayt tunṣibt ad tt-telmed tsuta i d-iteddun di lxir d lehna.
2 commentaires
ur teddiz ur tebriz, d tidet d tunṣibt d ayen yelhan d asurif yelhan ar zdat deg umennuɣ ɣef tmaziɣt, d acu kan amennuɣ tura ara ad yebdel talɣa, imi d leqdic n tidet n llsas i ilaqen ara ad neḍfer, ulayɣer nennaɣ tura ilaq ad nexdem kan
tamaziɣt d tutlayt tunṣibt, d ayen ttrajun imaziɣen n lezzayer seg wacḥal aya, fell-as i iruḥ acḥal d asfel, mmuten medden, ɛaben, nnejlan si tmurt, nɛettaben wiyaḍ… akken ad yesteɛref udabu azzayri s tutlayt-agi.
Dacu kan, akken nessen di lezzayer, iṣudaf llan, dacu asemres-nsen di tilawt ulac. Ihi ddabex di tama-nneɣ dima i d-yegra, lemmer ur nettennaɣ ara akken a d-nḥelli ttawilat i s-ilaqen i tmaziɣt akken a d-telḥu akken yewqem am akken ulac i yellan. Rnu ɣer waya, ifuraṣ s tmaziɣt (produits en tamaziɣt), d nekkni, d alag n tmaziɣt, ara ten-ixedmen, mačči d wiyaḍ; laqen isura, tisuqillin, idlisen, … annect-a ilaq ad yili weqbel ara ilin yedrimen.
Xersum, amennuɣ i d-iteddun yugar win i d-iɛeddan, u akka d afella ara nẓer imaziɣen ma bɣan tamaziɣt s tidet neɣ d asqecmeɛ kan i sqecmiɛen.