Talalit n teswast Tamaziɣt

2

Deg useggas 950 ngum tallit-nneɣ, Cacnaq amezwaru, yesbed iman-is d Ferɛun n Maṣer.
Amezruy imaziɣen yebda netta d win imaṣriyen, ugar n 5000 iseggasen aya. D tidet, isem Ilibiyen nettaf-it deg isemliyen iqdimen n Maṣer. Ɣur Imaṣriyen n zik, d imezrayen imezwura (igriganen neɣ ilatinen), Ilibiyen yeskanay wid izedɣen deg utaram n Maṣer, d ayen yemmalen Ilibiyen-agi s umata d Imaziɣen. Irusfusen imaṣriyen qqaren-d Imaziɣen d Imaṣriyen llan ttnaɣen si zik. Kra iṣuken iqdimen 3000 iseggasen ngum tallit-nneɣ, sskanen-d imennuɣen ger imaṣriyen d igelliden imaziɣen.
Ɣef wakken d-ttalsen isemliyen imaṣriyen, buhan seg imaziɣen kecmen ar Maṣer, zedɣen din, ddren d Imaṣriyen, ṭṭfen imukan am nutni (deg yigen, di tnezzut, deg wesɣan, ….).
Ssawḍen alarmi, deg useggas n 950 ngum tallit-nneɣ, Cacnaq amezwaru, si tarwa n yiwen ugellid amaziɣ, i d-yusan ar Maṣer sin iwinsen, yesbedd iman-is d Ferɛun, yeṭṭef akk tamurt n Maṣer, am wakken llant ddaw ufus-is aṭas n tmura i d-yezzin i Maṣer. Adlis uɣris n wudayen d imasiḥen yebder-it-id, imi yekcem ugellid-a tamurt n Falesṭin. Aseggas-a ihi, 950 ngum tallit Talalit-nneɣ , d tikkelt tamezwarut ideg amezruy yuder-d Imaziɣen, ladɣa, yiwen ugellid ameqqran seg-sen, yellan d bab n tissas deg wakud-nni. D talalit n teswast tamaziɣt.

Sɣur Kamal U Zerrad

Share.

About Author

2 Comments

    • yezmer lḥal d tidet, ilaq imnadiyen, ladɣa wid iqeddcen di taɣult umezruy, ad gen tizrawin (études) ara d-yesskeflen amezruy-nneɣ, akken xeddmen leǧnas-nniḍen.
      walaɣ, imi Imaziɣen ddren aṭas di tmurt n Maṣer, yezmer lḥal mačči d annecta akka ixedmen… ad ilin xedmen aṭas lecɣal ama di Maṣer, ama di tmura anda unagen.

Leave A Reply