Sɣur SADEK HADJERES, yettwakkes-d di Le Watan 03/01/2016
Yerra-t-id ɣer teqbaylit: Yazid Oulha
Tameddit n tmettant-is, nniɣ-t i twacult-is, i imassayen n FFS akk i medden: tajmilt yelhan ara s-nerr d asefti d usefrurex n wayen i d-yefka i weɣref azzayri, d asefti n temsirin umennuɣ ɣezzifen i d-yeǧǧa sdeffir-s, ama di tmurt-is neɣ deg umaḍal merra.
Ur s-iɣzifeɣ ara awal ɣef ineḍruyen d wayen i ɣ-icerken nekk yid-s di lweqt n » terbaɛt n PPA n Benɛeknun » deg useggas(1944-45) ama nella akken neɣ nella nembaɛad. Ugar ɣef waya, bɣiɣ a d-bedreɣ kra n temsal deg webrid n Lḥusin fell-as yeɛfu Rebbi, i yi-d-yettbanen sɛant azal azekka.
Amecwar i d-yenǧer, d abrid n trugza, d abrid umeɣnas ɣas ur yeshil ara. Abrid-is d abrid n widak yugin di teswiɛin n ẓẓmik, ad knun i ddel, i lexdeɛ d texnanasin akken bɣunt ilint.
Azal n wannect-a meqqer nezzeh ladɣa mti agdud neɣ tamurt ḥwaǧen ad zzuzfen ɣef yiman-nsen lḥif n wallaɣ neɣ win tedrimt i ten-yeggunin. D taɣawsa-agi yellan deg-s, i yeǧǧan aṭas n medden ḥeznen seg wul imi slan s tmettant-is u gan-as leqder meqqren deg wulawen-nsen. Llan daɣen wid yettɛezzin i yennumen tekksen tiqcert i lǧerḥ, bɣan ad ssamsen s yembuxxen anamek n tudert-is d umennuɣ-is am win yettɛezzin aɛdaw, am akken i t-neqqar nekni: « di tudert-is yectaq aḥebbu, imi yemmut ɛelqen-as agazu ».
Aɛezzi-agi d uḥezzez n wigi i yebɣan ad ssamsen abrid-is d inigi ɣef: temɣer n wergaz aserti i yettxemmimen dima ɣef inezgumen d uzekka n weɣref-is. Ay akken nebɣu nessawzel di lqima-s; ɣas nebɣa-t a t-neǧǧ d udem i ineṭḍen kan ɣer yiwet n tama n tmurt-is ; tamurt lezzayer akken ma tella tettwaɛqal s yes-s: netta d tamurt-is, tamurt-is d netta.
Iberdan iɣef yekkat AYT AHMED seg wasmi i yella meẓẓi tezzin ɣef fad n tlelli, d talwit, d tidet d teɣdemt tanmettit (justice sociale) ger warraw n tmurt-is.
Asɛuẓẓeg d tuzzya n weɛrur i tketwa n Ayt Ahmed akken tamurt ad teqqim tdukkel ɣef iberdan ireṣṣan i d-neǧren wid i tt-iḥerren sdeffir timunent n Lezzayer yeǧǧa-d leḥzen meqqren deg wulawen izzayriyen i tt-yuɣen mkemda. ɣef waya lmut-is tessegra-d s yilem ameqqran ɣer wid iḥemmlen tamurt-nsen. Ɣas ma lajel yiwen ur t-yettarra, ur d-neqqar ara yeǧga-yaɣ neɣ yeǧǧa tamurt-is ḥaca ma yemsa yizen i yebɣa ad yessiweḍ ger wat tmurt-is di lweqt i t-neḥwaǧ tura nezzeh.
Tamettant n Dda Lḥusin, tusa-d di teswiɛt i iẓemken aṭas ama ɣef tmurt n Lezzayer ama ɣef umaḍal merra. Di lweqt-a, yugar ucerrig tafawet di timura n Yill Agrakal d tid n tefriqt, merra zzin-d fell-asent ijenwiyen d lemkaḥel. Taswiɛt-a tuẓmikt, ahat d tagnit akken ad nmuqel akk jmiɛ ɣer deffir di lemri umezruy akken ad neddu akk jmiɛ di tafat ɣer zdat.
Di tegnit am ta i d-tettban lqima n wayen yesɛa wargaz-a ama d ayen icudden ɣer talsa neɣ i icudden ɣer tsertit i yessexdem ama di PPA, FLN neɣ FFS. Tajmilt i s-rran yemdanen d wazal ameqqran i s-fkan wid yeɣran, yesɛan anezgum ɣef tmurt d wegdud, d asirem ara yefken afud ugar i itekwa-s i d-yefrurin seg umennuɣ-is asertan.
Iswi mačči d aɛiwed i ineḍruyen amek i ddan i bɣiɣ a d-ḥkuɣ dagi, axater d ayen yettwassnen ɣer medden. Maca bɣiɣ ad d-rreɣ lwelha ɣef yiwet n temsalt i d-yeǧǧan later-is acḥal d abrid u mazal-itt ar ass-a tettfeǧǧig am tergit: d ayen i yeqqnen ɣer wefran iberdan i yuɣ Ayt Ahmed d wallalen i yessexdem i tifrat n wuguren igejdanen i tettmagar tmurt.
Amek almi Ayt Aḥmed yessaweḍ ad yeg tilist ger umennuɣ s lfuci d waldun d umenuɣ s tketwa d tsertit? Yettkemmil…..
Un commentaire
Ad yerḥem Rebbi Dda Lḥusin, d aɣerbaz, yesslemden akk izzayriyen ama s wayen yexdem, s wayen yenna ama s wayen yura. d argaz bu tissas, d argaz yewwten ɣef tmurt, yeṭṭfen deg wawal imeɣrasen, ur neqbil ad yaker taqejjirt, neɣ ad yaker lɛahed i imudd i yegrawliyen; d argaz yugin akursi s truẓi imensayen-is.
D argaz yextaren ula d tamettant-is a d tili d izen i yezzayriyen, d akemmel umennuɣ. yextar tamurt-is, alag-is, ad yemṭel s leɛwayed twacult-is; d ayen yessakin aṭas medden, yeǧǧa-ten ad xemmen ɣef imeslayen i d-yenna, ɣef webrid yekka;
Ihi, Dda Lḥusin d azamul, meqqer, ɣas yennejla nsell dima i lehdur-is, ɣas yemmut yedder yisem-is, yezga deg wulawen-nneɣ.
S tmettant Dda lḥsunin ḥusseɣ, s tidet, s waṭas n teqreḥ, d akken d asebter i idewwren di zzmam umezruy azzayri; ḥusseɣ belli d tasuta yegrawliwen tɛedda; Ma nwala daɣen irgazen isekren tagrawla am Dda lḥusin, u ad nwali isertiyen yellan tura, a d-ttrunt wallen ɣef ugerruj i ɣ-iruḥen.
Ad yerḥem Rebbi Dda Lḥusin d yergazen i t-yecban.