A lḥeqq anda telliḍ?

Iɣab lḥeqq neɣ iɣab ur yezmir a d-yenṭeq!? Di temdint-nneɣ, bɣiɣ a d-iniɣ di tmurt-nneɣ, qwant tukerḍiwin, tamḥeqranit ger medden, aseɣli n wawalen …yugar lefsed aseggem. D tawaɣit deg d-negra almi i yuɛer ad teffɣeḍ kečč d twacult-ik neɣ d wexxam-ik. Anwa seg-neɣ i d-yettali wawal mi ara iẓerr lbaṭel? Llan wid i d-yečča wul-nsen neṭqen-d neɣ gren-d iman-nsen, akken a d-rren lḥeqq ɣer wemkan-is, ruḥen di tcekkart, yuɣal-d fell-asen ẓẓur. Almi i d-yewweḍ wass n wussan llan wid seg-neɣ umi yemmut wul. Mi ẓran lbaṭel as-tiniḍ ẓran lḥeqq!? wiyaḍ teqqnen fell-as tiṭ am akken ur t-walan, ttagaden a sen-teḍru am imezwura i iruḥen di tcekkart!

Tikkelt yemlal lḥeqq d lbaṭel dduklen akken. Ddan acḥal almi lluẓen, kecmen ɣer usečču akken ad ččen. Ssutren ayen i sen-yehwan d tuččit, mi fukken qqimen dinna almi d-gran weḥḥed-sen. Lɣaci akk ffɣen. Iruḥ-d ɣur-sen bab usečču yenna-yasen:

– Ahaw xellṣet-iyi-d tsemḥem-aɣ ad nseyyeq, tura ad nbelleɛ taḥanut. Yerra-yas-d lbaṭel:

– Amek, nekni nettraju a ɣ-d-terreḍ ṣṣerf, kečč teqqareḍ-d xelleṣ-aɣ-d? nefka-yak-d meyat alef, d acu i ɣ-yeǧǧan akka neqqim almi d tura, d ṣṣerf i nettraju!

Bab n cci-nni, itebbet iman-is mliḥ d akken ur s-d-fkin ula n Duru ur nettɛedday ara, yekker yeggull-as i lbaṭel belli ur s-d-yefki acemma.

Lbaṭel yeṭṭef deg wawal-is amezwaru yenna-yas i bab n cci-nni:

-Nniɣ-ak ɣiwel err-aɣ-d ṣṣerf!

Yerna yeggull-as ula d netta ar fkan-as myat alef. Lḥeqq yexmet kan yessusem.

Bab n cci-nni yewwet deg ifassen-is, yerra-d nnehta d tameqqrant, yenna:

– Ah; a lḥeqq anda telliḍ?

Yerra-yas-d lbaṭel:

– Welleh ar ta dagi i yella, d acu ma yella yenṭeq-d welleh ar d ixelleṣ azgen.

Yazid ass n 16/ 08/2003