Yella yiwen wemɣar d temɣart, yal yiwen ɛziz fell-as wayla-s. Amɣar yesɛa aɣyul, tamɣart tesɛa taɣaṭ. tamɣart yall ass teṭṭeqqir iɣiɣden ɣer yiwen wemkan. Amɣar ur t-yeɛǧib ara ccɣel-agi, yerfa aṭas. Yiwen wass yenna-yas i temɣart: Ur ṭṭeqqir ara iɣiɣden ɣer wemkan-ihin, acku aɣyul-iw yettegliliz dinna ad yiccig, ad yeɣli ɣer yeɣzer. Tamɣart, imeslayen-agi ɣlin-as-d ɣer tmeẓẓuɣt-nni taɛezzugt. Terra-yas-d ur d-cligeɣ ara ma yemmut. Kra n wussan kan iruḥ weɣyul-nni yeglalez anda akken teṭṭeqqir temɣart iɣiɣden, yuccag yeɣli s iɣzer, yemmut. Amɣar yerfa yeggul ar akken i d-teqqed deg weɣyul-is, ula d netta a tt-yeqqed di taɣaṭ-is. Yekker, yeddem taɣaṭ-nni yewwi-tt a tt-iḍeqqer ɣer yeɣzer, imi yewweḍ ɣer yeɣzer, iruḥ a tt-iḍeqqer, yeḥṣel yicc n taɣaṭ deg uqendur-is, yedda ula d netta yeɣli s iɣzer. Teqqim-d temɣart nettat d tbarda n wuɣyul-nni, tekker teddem-d taberda-nni a tt-tḍeqqer ula d nettat. Mi tewweḍ s iɣẓer akken a tt-tḍeqqer, ziɣemma ṭṭfer n tbarda-nni yewḥel di temgerṭ n temɣart, tedda ula d nettat teɣli s iɣzer, tufa-n dinna amɣar-is. Bdan ttemyuzzamen gar-asen d anwa i d ssebba n taluft. Wa yeqqar i wayeḍ d kečč i d ssebba. Iɛedda-d syinna yiwen wemsebrid, yesla-yasen mi ttennaɣen gar-asen di lqaɛ n yeɣzer, yenna-yasen d acu ken-id-yewwin ɣer dinna, ulsen-as-d tadyant seg tazwara alarmi d tagara, dɣa yenna-yasen: i sin yid-wen txedmem, i sin yid-wen ad txellṣem, xas ur ttkalayet ara fell-i a ken-id-sellkeɣ, nekk ḥareɣ, zerbeɣ sɛiɣ lecɣal i yi-tt-raǧǧun. Iruḥ yeǧǧa-ten di lqaɛ n yeɣzer weḥlen.
Youcef Achouri
